• Басты бет
• Қаржы
• Тұрғын үй қарыздарын қайта қаржыландыру бағдарламасына 150,6 мың ипотека алушы қатысты

Тұрғын үй қарыздарын қайта қаржыландыру бағдарламасына 150,6 мың ипотека алушы қатысты

Бағдарлама аясында несие шарттары қайта қаралды

Қазақстанда тұрғын үй қарыздарын қайта қаржыландыру бағдарламасына 150,6 мың ипотека алушы тартылды. Бұл туралы Kapital.kz іскерлік ақпарат орталығы Қаржы нарығын реттеу және дамыту агенттігінің баспасөз қызметіне сілтеме жасап хабарлайды.

Бағдарламаның бірінші бағыты 2004–2020 жылдары ипотека алған азаматтардың жалғыз баспанасын сақтап қалуға арналған. 2026 жылғы 1 маусымдағы мәліметке сәйкес, банктер жалпы сомасы 213,4 млрд теңге болатын 33,3 мың несиені қайта қаржыландырды.

Бағдарламаның екінші бағыты аясында 2016 жылғы 1 қаңтарға дейін берілген шетел валютасындағы ипотекалық несиелер айырбасталды және қайта қаржыландырылды. Бұл ретте банктер 114,4 млрд теңгеге шетел валютасындағы 16,2 мың ипотекалық қарызды қайта рәсімдеді.

Үшінші бағыт бойынша 2026 жылғы 1 маусымдағы мәліметке қарағанда, банктер халықтың әлеуметтік осал топтарына жататын 10,6 мың қарыз алушыға 101,1 млрд теңге көлемінде қосымша қаржылық қолдау көрсетті.

Қолдау шаралары ретінде қарыз алушының берешегі азайтылып, жеңілдетілген өтеу кестелері бекітілді, сондай-ақ банк балансына өткен жалғыз баспананы қарыз алушының меншігіне қайтару жұмыстары жүргізілді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз