Үкімет жыл қорытындысы бойынша экономиканың кемінде 5%-ға өсуін күтеді
Басты басымдықтардың бірі – халықтың нақты табысын 2-3%-дан жоғары деңгейде өсіріп, кредиттік жүктемені азайту
Халықтың нақты табысын арттыру – үкіметтің негізгі басымдықтарының бірі. Бұл туралы үкімет отырысында премьер-министрдің орынбасары – ұлттық экономика министрі Серік Жұманғарин мәлімдеді, деп хабарлайды Kapital.kz іскерлік ақпарат орталығы.
Оның айтуынша, осы мақсатта үкімет Ұлттық банкпен және Қаржы нарығын реттеу және дамыту агенттігімен бірлесіп 2026-2028 жылдарға арналған Макроэкономикалық тұрақтандыру және халықтың әл-ауқатын арттыру бағдарламасын іске асырып жатыр.
«Бұдан бөлек, биыл халықтың табысын арттыруға бағытталған жеке бағдарлама қабылданды. Жалақыны көтеру, сапалы жұмыс орындарын құру, борыштық жүктемені азайту және кәсіпкерлікті дамытуға ынталандыру бойынша шаралар қабылданады. Сондай-ақ ең төменгі жалақы мөлшерін, азаматтық қызметшілердің жалақысын және өзара міндеттемелерді орындау арқылы жалдамалы қызметкерлердің табысын арттыру мәселесі қаралады. Халықтың кредиттік жүктемесі мен тұтынушылық несиелердің өсуіне ерекше назар аударылып отыр», – деді Серік Жұманғарин.
Ол үкімет үшін негізгі бағдар халықтың нақты табысын 2-3%-дан жоғары деңгейде өсіру екенін атап өтті.
«Халық табысының артуына экономиканың тұрақты әрі сапалы өсімін қамтамасыз етуге және инфляцияны төмендетуге бағытталған шаралар да ықпал етеді. Сыртқы экономикалық жағдайдың күрделенуіне қарамастан, Қазақстан экономикасы сапалы өсім көрсетіп отыр. 2025 жылдың қорытындысында экономика 6,5%-ға өсіп, соңғы жылдардағы ең жоғары көрсеткіштердің біріне жетті. Биыл да оң динамика сақталуда. Қаңтар-мамыр айларының қорытындысында экономика 3,7%-ға өсті. Мұнай өндіруді есептемегендегі өсім 5%-дан асты. Бұл экономиканың құрылымы біртіндеп өзгеріп, шикізаттық емес салалардың рөлі күшейіп келе жатқанын көрсетеді», – деді министр.
Үкімет жыл қорытындысында экономиканың өсімі кемінде 5% болады деп күтеді. Бұл үшін әртараптандыру және инвестиция тарту бағыты жалғасады.
«Қаңтар-мамыр айларында негізгі капиталға салынған инвестициялар 7%-ға өсті. Инвестиция құрылымы өзгеріп келеді. Өңдеу өнеркәсібіне, көлік инфрақұрылымы мен логистикаға, ауыл шаруашылығына және цифрлық инфрақұрылымды дамытуға салынатын инвестициялар артып жатыр. Тартылатын инвестициялардың сапасын жақсарту мақсатында 2030 жылға дейінгі инвестициялық саясат тұжырымдамасы іске асырылуда. «Бәйтерек» холдингін капиталдандыру да инвестициялық белсенділікке қосымша серпін береді. Біздің міндет – проактивті тәсіл аясында шетелдік және отандық компанияларды Қазақстанның мүмкіндіктері туралы ақпараттандырудан бастап, тұрақты қызығушылық қалыптастыруға, жобаларды жан-жақты зерделеуге және оларды іске асыруға дейінгі барлық кезеңде жүйелі түрде сүйемелдеу. Қазірдің өзінде министрліктер жалпы құны 4 трлн теңгеден асатын инвестициялық жобалар пулын қалыптастырды», – деді Серік Жұманғарин.
Министрдің айтуынша, экономиканың тұрақты дамуының маңызды факторы – шағын және орта бизнес. Соңғы бес жылда ШОБ секторы тұрақты өсім көрсетіп, ел экономикасының шамамен 40%-ын қалыптастырып отыр. Осы кезеңде салада жұмыспен қамтылғандар саны шамамен 30%-ға артқан. 2025 жылы бизнес субъектілерінің саны 110,5 мың бірлікке көбейді.
2026 жылғы 1 маусымдағы жағдай бойынша салық төлеушілердің жалпы саны 2 млн 806 мыңға жетіп, жыл басымен салыстырғанда 367 мыңға артты. Өзін-өзі жұмыспен қамту режимін қолданатын азаматтар саны 543,5 мың адамға жетті.
Серік Жұманғариннің сөзінше, бес айдың қорытындысы салық түсімдерінің оң динамикасын көрсетті. Жалпы түсімдер 18%-ға, ал қосылған құн салығы бойынша түсімдер 45,1%-ға өскен.
«Экономиканың ұзақ мерзімді әрі тұрақты өсімін қамтамасыз етудің маңызды шарты – инфляцияны төмендету. Биыл үкіметтің алдында инфляцияны 10%-дан төмен деңгейге түсіру міндеті тұр. Инфляциялық үдерістер біртіндеп тұрақтанып келеді. Маусым айының қорытындысында инфляция 10,3%-ға дейін баяулады», – деді ол.
Еске салайық, парламент палаталарының бірлескен отырысында Қасым-Жомарт Тоқаев Қазақстанның жаңа экономикалық модельге көшуі қажет екенін айтып, бұрынғы жұмыс тәсілдері енді тиімді болмайтынын мәлімдеген болатын. Сонымен қатар президент мемлекеттік басқару жүйесін ауқымды реформалау басталғанын жариялады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
