Астанадағы авиациялық инфрақұрылымды жаңғырту 2027 жылы басталады
Әуежай инфрақұрылымын жаңарту жұмыстары үш жылға созылады
2027 жылы Астананың авиациялық инфрақұрылымын жаңғырту жұмыстары басталады. Бұл туралы үкімет отырысында Көлік министрі Нұрлан Сауранбаев мәлімдеді, деп хабарлайды Kapital.kz іскерлік ақпарат орталығы.
«Әуежай инфрақұрылымына келетін болсақ, алдағы үш жыл ішінде оны жаңғырту жұмыстары жүргізіледі. Бұған дейін айтылғандай, Астана әуежайын жаңғырту – бірінші кезектегі міндет. Қала әкімдігі қажетті дайындық жұмыстарын жүргізіп жатыр. Құрылысты келесі жылы бастау жоспарланып отыр», – деді ведомство басшысы.
Оның айтуынша, авиациялық хабтарды дамыту жұмыстары Алматы, Астана, Ақтау, Ақтөбе, Қарағанды және Шымкент қалаларындағы алты ірі әуежайға шоғырланған. Бұл бағытта қажетті институционалдық және инфрақұрылымдық жағдайлар жасалуда.
«Жүк авиациясын дамыту еліміздің транзиттік әлеуетін нығайтып, халықаралық логистикалық тізбектерге интеграциясын кеңейтуге мүмкіндік береді. Осыған байланысты мемлекет тарапынан қажетті шешімдер қабылданды. Сонымен қатар жүк авиациясын дамытудың бес жылдық жоспары әзірленді», – деді Нұрлан Сауранбаев.
Еске салайық, бұған дейін Парламент палаталарының бірлескен отырысында президент елордада жаңа әуежай құрылысын қысқа мерзімде бастауды тапсырған болатын.
Сондай-ақ елорданы дамыту мәселелері жөніндегі кеңесте Қасым-Жомарт Тоқаев Астанада жаңа әуежай салу мүмкіндігін қарастыруды ұсынған еді. Мемлекет басшысының пікірінше, бұл елорданың көлік-транзиттік әлеуетін арттыруға мүмкіндік береді.
Әзірге екінші әуежайдың нақты қай жерде орналасатыны туралы түпкілікті шешім қабылданған жоқ.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
