Ұлытау облысы Қытайдан 368 млн доллардан астам инвестиция тартуды жоспарлап отыр
Қаражат өнеркәсіпті дамытуға, инфрақұрылымды жаңғыртуға және төмен көміртекті индустриялық кластер құруға бағытталады
«Ulytau Invest – 2026» инвестициялық форумы аясында Ұлытау облысы Қытай бизнесімен жалпы құны 368,6 млн долларды құрайтын инвестициялық меморандумдарға қол қойды. Іс-шараға Қытайдың 20-дан астам ірі компаниясының делегациялары қатысты, деп хабарлайды Kapital.kz іскерлік ақпарат орталығының тілшісі облыс әкімдігінің баспасөз қызметіне сілтеме жасап.
«Қол қойылған құжаттар тұрғын үй қорын және қалалық инфрақұрылымды жаңғыртуға, өнеркәсіпті дамытуға, шахталардағы өндірістік қауіпсіздікті арттыруға, төмен көміртекті индустриялық кластер қалыптастыруға, сондай-ақ өңірде жел электр станцияларын салуға бағытталған бірқатар инвестициялық жобаны іске асыруды көздейді», – делінген хабарламада.
Форум қарсаңында Ұлытау облысының әкімі Дастан Рыспеков Шэньси провинциясы делегациясының жетекшісі Ван Цзинцзинмен екіжақты кездесу өткізіп, сауда-экономикалық ынтымақтастықты кеңейту және жаңа инвестициялық жобаларды жүзеге асыру мәселелерін талқылады.
«Ulytau Invest–2026» форумында өңірдің тау-кен металлургиясы, өңдеуші өнеркәсіп, агроөнеркәсіптік кешен, энергетика, логистика және инфрақұрылым салаларындағы инвестициялық мүмкіндіктері таныстырылды. Сонымен қатар Қазақстан мен Қытай бизнес өкілдері арасында B2B және G2B форматында кездесулер өтті.
Еске салайық, 2025 жылы Қазақстанға тартылған тікелей шетелдік инвестициялардың жалпы көлемі 14%-ға өсіп, 20 млрд доллардан асты.
Сондай-ақ Астанада Цзянсу провинциясының Орталық Азиядағы жаңа орталығы ашылды. Ол қытайлық компанияларға консалтинг қызметін көрсететін, көрме ісін ұйымдастыратын және «Жібек жолы» электрондық коммерциясы бағытында қолдау көрсететін бірыңғай сервистік хаб болады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
