Қаржы реттеушісі сақтандыру компанияларын бағалаудың жаңа моделін енгізді
Енді сақтандыру ұйымдарына жыл сайын тәуекел рейтингі беріледі, соған қарай қадағалау шаралары айқындалады
Қаржы нарығын реттеу және дамыту агенттігі сақтандыру компанияларын қадағалап бағалаудың жаңа моделін енгізді.
SRES (Supervisory Risk Evaluation System) моделі Solvency II қағидаттары мен IFRS 17 халықаралық қаржылық есептілік стандартына сәйкес әзірленіп, қаржы реттеушісі тарапынан сәтті сынақтан өтті.
«Әзірленген әдістеменің тиімділігін тексеру мақсатында 2025 жылы пилоттық режимде бірқатар сақтандыру ұйымына кешенді қадағалау бағалауы жүргізілді. Бұл модельдің әртүрлі бизнес-модельдер жағдайындағы тұрақтылығын тексеруге мүмкіндік берді. Пилоттық жобаның нәтижелері қазіргі нарық жағдайында SRES тәсілінің тиімділігі мен өзектілігін растады. Осыған байланысты агенттік бұл жобаны сақтандыру нарығының барлық субъектісін қамтитындай етіп кеңейтуге кірісті», – деді ҚНРДА төрағасының бірінші орынбасары Тимур Әбілқасымов.
Пилоттық жоба барысында агенттік мамандары сақтандыру компанияларының 1,5 мыңнан астам ішкі құжатын зерттеді. Жүйе 37 сандық көрсеткіш пен 834 сапалық сұрақтың үйлесіміне негізделген. Жаңа тәсіл негізгі көрсеткіштердің қазіргі жағдайы мен динамикасын, сондай-ақ тәуекелдердің нақты шоғырлану деңгейін жан-жақты бағалап, сақтандыру компанияларының жағдайын барынша ашық көрсетуге мүмкіндік береді.
Агенттік мәліметінше, жаңа модельдің стандарттары тәуекелдерді басқару мен бағалау тәсілін, сондай-ақ сақтандыру міндеттемелерін қалыптастыру және есептеу қағидаттарын түбегейлі өзгертеді. Оның негізіне қаржылық көрсеткіштерді талдау ғана емес, корпоративтік басқару сапасын, тәуекелдерді басқару жүйесінің тиімділігін, өтімділікті, бизнес-модельдің өміршеңдігін және клиенттердің мүддесін қорғау деңгейін бағалау енгізілген.
Жаңа модельдің негізгі элементтерінің бірі – сақтандыру компанияларының менеджерлері мен құрылымдық бөлімше басшыларымен сұхбат өткізу. Сарапшылардың пікірінше, мұндай бағалау ұйымның тәуекелдер бейінін тереңірек талдауға және қадағалау сапасын арттыруға мүмкіндік береді.
Пилоттық жоба қорытындысы бойынша жаңа қадағалау моделін енгізу нәтижелері, сақтандыру компанияларын дамыту бағыттары және қадағалау жөніндегі күтілетін талаптар қамтылған егжей-тегжейлі есеп дайындалды.
Биылдан бастап қадағалау бағалауы жыл сайын жүргізіледі. Оның қорытындысы бойынша әрбір компанияға 1-ден (төмен тәуекел) 4-ке (жоғары тәуекел) дейінгі тәуекел рейтингі беріледі. Осы рейтингке қарай қадағалау қарқындылығы мен реттеушінің шаралары, соның ішінде анықталған кемшіліктерді жою талаптары және қажет болған жағдайда капиталға қосымша қадағалау үстемесін енгізу айқындалады.
Пилоттық тестілеу нәтижелері сақтандыру компанияларының басым бөлігінде тәуекелдерді басқарудың базалық жүйелері қалыптасқанын көрсетті. Сонымен қатар агенттік цифрлық трансформацияға ерекше назар аударып, сақтандырушыларға клиенттерге қызмет көрсетудің толық цифрлық процестерін дамытуға, залалды реттеу мен клиенттермен өзара іс-қимыл кезінде жасанды интеллект технологияларын белсендірек пайдалануға кеңес берді.
ҚНРДА атап өткендей, тәуекелдерді қадағалап бағалау жүйесі экономикалық жағдайларға қарай жетілдіріліп отырады. SRES моделін толыққанды енгізу сақтандыру секторының қаржылық тұрақтылығын арттырып, тәуекелдерді басқару сапасын жақсартып қана қоймай, оның ұзақ мерзімді капиталдың маңызды институтына айналуына мүмкіндік береді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
