Ұлттық банк Ресейдегі жанармай нарығындағы ахуалдың ықтимал салдарын бағалады
Тимур Сүлейменовтің айтуынша, Ресейдегі үдерістердің Қазақстан экономикасына әсерін әзірге нақты бағалау мүмкін емес
Ресейдің жанармай нарығындағы жағдай Қазақстан Ұлттық банкінің жіті бақылауында. Алайда оның ел экономикасына ықпалы туралы нақты болжам жасауға әлі ерте. Бұл туралы қаржы реттеушісінің төрағасы Тимур Сүлейменов мәлімдеді, деп хабарлайды Kapital.kz іскерлік ақпарат орталығы.
Ұлттық банк басшысы Ресей Қазақстанның негізгі сауда серіктестерінің бірі екенін атап өтті. Сондықтан реттеуші көрші елдегі макроэкономикалық өзгерістерді, соның ішінде ақша-кредит саясаты мен салық реформаларына қатысты шешімдерді тұрақты түрде бақылап отырады.
«Ресейдегі барлық макроэкономикалық оқиғаларды – негізгі мөлшерлеменің өзгеруін, салық реформаларын және басқа да үдерістерді біз Ұлттық банк ретінде мұқият бақылап отырмыз. Әзірге Ресейдегі инфляция өздері жоспарлаған дәліз аясында қалыптасып келеді. Бірақ жағдайдың қалай өрбитінін бақылауды жалғастырамыз. Қазірдің өзінде қандай да бір түпкілікті қорытынды жасағым келмейді, өйткені қазіргі ахуалдың Ресей экономикасына қалай әсер етіп жатқаны әзірге анық емес», – деді Тимур Сүлейменов Үкімет кулуарында.
Ұлттық банк төрағасы Ресейдегі инфляцияның өсуі сауда және баға арналары арқылы Қазақстанға да ықпал етуі мүмкін екенін айтты. Алайда бұл әсердің сипаты мен ауқымы әзірге белгісіз.
«Егер Ресейде инфляция өсіп, баға қымбаттай бастаса, бұл сауда серіктесі ретінде бізге де белгілі бір деңгейде әсер етуі мүмкін. Бірақ баға өсе ме, қаншалықты өседі, қандай деңгейге жетеді және қандай тауар топтарына қатысты болады – мұның бәрін бақылау қажет. Сондықтан әзірге алысқа баратын қорытындылар жасауға болмайды», – деп түйіндеді Тимур Сүлейменов.
Бұған дейін Қазақстаннан шамамен 17 тонна жанар-жағармай материалдарын заңсыз әкету әрекеті анықталғаны хабарланған болатын.
Қаңтар-наурыз айларында Қазақстанда 3,7 млн тонна мұнай өнімдері өндірілді. Ал сәуір айында Энергетика вице-министрі Қайырхан Тұтқышбаев мемлекет бензин бағасының күрт өсуіне жол бермейтінін мәлімдеген еді.
Еске салайық, 2025 жылдың қазан айында Қазақстанда АИ-92 маркалы бензин мен дизель отынының бағасын көтеруге мораторий енгізілген болатын. Ол 1 сәуірден бастап өз күшін жойды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
