«Әңгіме көп, іс аз»: Президент үш ЖЭО құрылысын жеделдетуді тапсырды
Қасым-Жомарт Тоқаев Көкшетау, Семей және Өскеменде үш жыл ішінде жаңа жылу электр орталықтарын салуды міндеттеді
Қазақстанда алдағы үш жыл ішінде Көкшетау, Семей және Өскемен қалаларында үш жаңа жылу электр орталығын (ЖЭО) салу қажет. Мұндай тапсырманы президент Қасым-Жомарт Тоқаев Парламент палаталарының бірлескен отырысында берді, деп хабарлайды Kapital.kz іскерлік ақпарат орталығы.
Президент наурыз айында таза көмір генерациясын дамытуға бағытталған ұлттық жоба бекітілгенін еске салды. Оның айтуынша, құжатта энергетика саласын тиімділігі мен экологиялық талаптары жоғары заманауи технологиялар негізінде жаңғырту көзделген.
«Алдағы үш жылда Көкшетау, Семей және Өскеменде жоғары экологиялық стандарттарға сай технологиялар қолданылатын үш жаңа ЖЭО салынуы тиіс. Бұл станциялар міндетті түрде іске асырылуы қажет. Бұл бағытта әңгіме көп, іс аз», – деді мемлекет басшысы.
Еске салайық, Ұлттық құрылтайдың V отырысында Қасым-Жомарт Тоқаев Қазақстанда шамамен 33 млрд тонна көмір қоры бар екенін айтып, көмір генерациясын дамыту жұмыстарын ұлттық жоба мәртебесіне көтеруді тапсырған болатын. Соның нәтижесінде 2026 жылғы наурызда Қазақстанда көмір генерациясын дамыту жөніндегі ұлттық жоба бекітілді. Жаңа станциялар салу және қолданыстағы нысандарды жаңғырту үшін 7,5 трлн теңге инвестиция қажет.
Көкшетаудағы ЖЭО құрылысын 2029 жылдың наурызында аяқтау жоспарланып отыр. Станция «таза көмір» технологиясы бойынша салынып жатыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
