Қазақстан мен Грузия стратегиялық серіктестікті кеңейтуге келісті
Үкімет басшылары инвестиция, көлік, энергетика және жасанды интеллект салаларындағы бірлескен жобаларды талқылады
Қазақстан Республикасының премьер-министрі Олжас Бектенов Қазақстанға ресми сапармен келген Грузияның премьер-министрі Ираклий Кобахидземен кездесті. Бұл туралы primeminister.kz сайтына сілтеме жасап, Kapital.kz іскерлік ақпарат орталығы хабарлайды.
Кездесу барысында тараптар сауда-экономикалық, инвестициялық, көлік-логистика, энергетика салаларындағы ынтымақтастықты, сондай-ақ цифрландыру бағытындағы өзара іс-қимылды талқылады. Сонымен қатар мемлекет басшысы Қасым-Жомарт Тоқаев пен Грузия премьер-министрі Ираклий Кобахидзе арасында өткен келіссөздер барысында қол жеткізілген уағдаластықтарды іске асыру мәселесіне ерекше назар аударылды.
«Сіздің ресми сапарыңыз Қазақстан мен Грузия арасындағы қарым-қатынастың қарқынды дамып келе жатқанын көрсетеді. Бұл – саяси диалогтың жоғары деңгейінің, өзара сенім мен берік серіктестіктің айқын дәлелі. Кеше сіз Қазақстан Республикасының президенті Қасым-Жомарт Тоқаевпен мазмұнды келіссөздер өткіздіңіз. Қазақстан Грузияны сенімді дос әрі Оңтүстік Кавказ бен Қара теңіз өңіріндегі маңызды стратегиялық серіктес ретінде қарастырады. Қазақстан үкіметі Грузия үкіметімен диалогты және практикалық ынтымақтастықты одан әрі тереңдетуге дайын», – деді Олжас Бектенов.
Өз кезегінде Ираклий Кобахидзе Қазақстанның Грузия үшін негізгі серіктестердің бірі екенін атап өтіп, екіжақты ынтымақтастықты одан әрі кеңейтуге мол мүмкіндік бар екенін айтты.
«Біздің елдерді тарихи достық қарым-қатынас байланыстырады. Бұл саяси және экономикалық байланыстарды нығайтудың берік негізі. Қазақстан – Грузия үшін өте маңызды серіктес және біздің қарым-қатынасымыздың маңызы ерекше. Екі ел арасында стратегиялық серіктестік орнағанына қуаныштымыз. Біз Қазақстандағы жаңғырту үдерістерін мұқият бақылап отырмыз және барлық бағыт бойынша екіжақты ынтымақтастықтың одан әрі кеңейетініне сенім артамыз», – деді Ираклий Кобахидзе.
Жоғары деңгейде қол жеткізілген келісімдерді дамыту аясында тараптар экономиканың басым салаларындағы бірлескен жобаларды іске асыру шараларын талқылады. Технологиялық серіктестік мәселесінде жасанды интеллект саласындағы жобаларға ерекше назар аударылды.
Келіссөз қорытындысында Қазақстан мен Грузия үкіметтері стратегиялық серіктестікті одан әрі нығайтуға және барлық перспективалы бағыт бойынша практикалық ынтымақтастықты кеңейтуге дайын екенін растады.
Айта кетейік, 2025 жылдың қорытындысы бойынша Қазақстан мен Грузия арасындағы өзара тауар айналымы 184,5 млн долларды, ал биылғы қаңтар–сәуір айларында 53 млн долларды құрады. Қазіргі таңда Қазақстан нарығында грузин капиталының қатысуымен 600-ден астам компания жұмыс істейді, ал 14 ұйым Астана халықаралық қаржы орталығында (АХҚО) тіркелген.
Еске салайық, бұған дейін Қазақстан мен Грузия арасындағы ауыл шаруашылығы өнімдерінің тауар айналымы бір жылда 77%-ға өскені хабарланған болатын. Сондай-ақ Қазақстан «Баку – Тбилиси – Жейхан» бағыты бойынша мұнай транзитін ұлғайтуды жоспарлап отыр. Бұдан бөлек, екі ел стратегиялық серіктестіктің жаңа жол картасын әзірлеуде.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
