Қазақстан мен Грузия арасындағы ауыл шаруашылығы өнімдерінің саудасы 77%-ға өсті
Қазақстан Грузияға астық, ұн, өсімдік майы мен ет өнімдерінің экспортын ұлғайтуды көздеп отыр
Қазақстанның ауыл шаруашылығы министрі Айдарбек Сапаров Грузияның Қоршаған ортаны қорғау және ауыл шаруашылығы министрі Давид Сонгулашвилимен агроөнеркәсіп кешеніндегі ынтымақтастық мәселелерін талқылады. Бұл туралы еліміздің ауыл шаруашылығы министрлігінің баспасөз қызметіне сілтеме жасап, Kapital.kz іскерлік ақпарат орталығы хабарлайды.
Келіссөз барысында тараптар агроөнеркәсіп кешеніндегі екіжақты ынтымақтастықты одан әрі дамыту, ауыл шаруашылығы өнімдерінің өзара саудасын кеңейту және бірлескен инвестициялық жобаларды іске асыру перспективаларын қарастырды.
Айдарбек Сапаров Қазақстанның Кавказ өңіріндегі негізгі серіктестерінің бірі ретінде Грузияға ерекше мән беретінін, ал ауыл шаруашылығы екі ел экономикасының маңызды саласы екенін атап өтті.
«Екі ел арасындағы ауыл шаруашылығы өнімдерінің өзара саудасы тұрақты өсіп келеді. 2025 жылдың қорытындысы бойынша ауыл шаруашылығы өнімдерінің тауар айналымы 77%-ға өсіп, 116 млн доллардан асты. Бұл ынтымақтастығымыздың зор әлеуетін көрсетіп, оны одан әрі кеңейтуге берік негіз қалайды», – деді министр.
Өз кезегінде Давид Сонгулашвили аграрлық саладағы екіжақты өзара іс-қимылдың жоғары деңгейін атап өтіп, әріптестікті одан әрі нығайтуға, ауыл шаруашылығы өнімдерінің саудасын кеңейтуге, бірлескен инвестициялық жобаларды жүзеге асыруға және агроөнеркәсіп кешеніндегі озық технологиялармен алмасуға мүдделі екенін жеткізді.
Кездесуде Грузия нарығына ауыл шаруашылығы өнімдерін жеткізу көлемін арттыру мәселесіне ерекше назар аударылды. Қазақстан тарапы астық, ұн, өсімдік майы, макарон өнімдері, ет, сүт өнімдері, шоколад және кондитерлік өнімдер экспортын ұлғайтуға қызығушылық білдірді.
Тараптар ветеринария саласындағы ынтымақтастық мәселелерін де талқылады. Атап айтқанда, Қазақстаннан Грузияға тірі шошқа мен шошқа етін экспорттау үшін ветеринариялық-санитариялық талаптарды келісу рәсімдерін аяқтаудың, сондай-ақ асыл тұқымды және тауарлық ірі қара мен ұсақ малды экспорттауға қатысты бұрын келісілген ветеринариялық сертификаттарды іс жүзінде қолданудың маңыздылығы айтылды.
«Қазақстан мен Грузия арасындағы ынтымақтастықтың жандануы екі елдің агроөнеркәсіп кешенінің дамуына, азық-түлік қауіпсіздігін нығайтуға және бизнес үшін жаңа мүмкіндіктердің ашылуына ықпал етеді деп сенемін», – деп түйіндеді Айдарбек Сапаров.
Еске салайық, бұған дейін мемлекет басшысы Қасым-Жомарт Тоқаев Қазақстанның «Баку – Тбилиси – Жейхан» бағыты бойынша мұнай транзитінің көлемін ұлғайтуды жоспарлап отырғанын мәлімдеген болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
