Қазақстан Түрікменстанға экспорт көлемін 200 млн долларға арттыруға дайын
Ол үшін металлургия, машина жасау, тамақ және химия өнеркәсібі өнімдерін қамтитын 178 тауар позициясының тізімі әзірленді
Астанада өткен бизнес-форум аясында Қазақстанның 100-ден астам және Түрікменстанның 40-тан астам компаниясы B2B форматында келіссөздер жүргізді. Форум қорытындысы бойынша электрондық коммерция, логистика, инвестициялық-құрылыс саласы және кәсіпкерлікті қолдау бағыттарында ынтымақтастық туралы келісімдерге қол қойылды. Бұл туралы Сауда және интеграция министрлігінің баспасөз қызметіне сілтеме жасап, Kapital.kz іскерлік ақпарат орталығы хабарлайды.
Соңғы бес жылда Қазақстан мен Түрікменстан арасындағы тауар айналымы екі еседен астам өсіп, 530 млн АҚШ долларынан асты. Қазақстанның Түрікменстанға экспорты шамамен 50%-ға ұлғайып, 316,3 млн АҚШ долларына жетсе, Түрікменстаннан импорт көлемі бес есеге өсіп, 215,8 млн АҚШ долларын құрады. Ал 2026 жылдың қаңтар–сәуір айларының қорытындысы бойынша екі ел арасындағы тауар айналымы 180 млн АҚШ долларын құрап, өткен жылдың сәйкес кезеңімен салыстырғанда 7%-ға артты. Қазақстаннан экспорт 18,9%-ға өсіп, 114,8 млн АҚШ долларына жетті.
«Сауда ынтымақтастығын кеңейту мақсатында Қазақстан экспорттық әлеуеті 200 млн АҚШ долларынан асатын шикізаттық емес 178 тауар позициясының тізбесін әзірледі. Экспорт көлемін ұлғайту үшін ең жоғары әлеует металлургия, машина жасау, тамақ, химия және мұнай-химия өнеркәсібі, көлік құралдарын өндіру, фармацевтика және құрылыс материалдары салаларында шоғырланған», – деді Сауда және интеграция бірінші вице-министрі Айжан Бижанова.
Қазақстан-Түрікменстан үкіметаралық комиссиясының 14-отырысында өзара сауда үйлерін құру, цифрлық сауданы дамыту, тауар айналымын ұлғайту жөніндегі жол картасын келісу және сауданы қаржыландыру тетіктерін енгізу мәселелері талқыланды. Сондай-ақ сауда үйлері базасында инвестициялық жобаларды сүйемелдеу, өнеркәсіптік кооперацияны дамыту және саудадағы кедергілерді жоюды қамтитын кәсіпкерлерді қолдаудың тиімді жүйесін қалыптастырудың маңыздылығы атап өтілді.
«Агроөнеркәсіптік кешенде, тоқыма өнеркәсібінде, энергетика, көлік және логистика салаларында ынтымақтастықты дамыту үшін елеулі мүмкіндіктер бар. Транскаспий халықаралық көлік бағытының маңызы артып келеді. Қазақстан мен Түрікменстан Азия мен Еуропа нарықтарын байланыстыратын осы дәліздің маңызды қатысушылары болып табылады. Көлік инфрақұрылымын бірлесіп дамыту және логистикалық рәсімдерді одан әрі жеңілдету екі ел бизнесі үшін жаңа мүмкіндіктер ашады», – деді «QazTrade» АҚ бас директорының орынбасары Нұрлан Құлбатыров.
Форум қорытындысы бойынша бірқатар екіжақты құжаттарға қол қойылды. Атап айтқанда, «QazTrade» АҚ мен Түрікменстан Өнеркәсіпшілер және кәсіпкерлер одағы арасында кәсіпкерлікті қолдау, экспортты ілгерілету және екі елдің бизнес қауымдастықтары арасындағы іскерлік байланыстарды кеңейту саласындағы ынтымақтастық туралы меморандум жасалды. Сонымен қатар «Silk Way Asia Trade» ЖШС мен «Hazar Logistik» шаруашылық қоғамы, сондай-ақ «Silk Way Asia Trade» ЖШС мен «Gamma» жеке кәсіпорны арасында электрондық коммерция саласындағы ынтымақтастық жөніндегі келісімдерге қол қойылды. Бұдан бөлек, «Ashra Solutions» ЖШС мен «Ojar Aziýa» жеке кәсіпорны инвестициялық-құрылыс саласындағы ынтымақтастық туралы келісім жасасты.
«Форумның негізгі бағыты – B2B форматындағы келіссөздер. Біз трейдерлер мен дистрибьюторларды ғана емес, өндіруші кәсіпорындарды да шақырдық. Мақсатымыз – тікелей байланыстар орнатып, сенімді жеткізу тізбектерін қалыптастыру. Мысалы, тоқыма саласында жіп пен мата өндірушілер мен дайын өнім шығаратын қазақстандық тігін кәсіпорындары арасында тікелей ынтымақтастық орнатуға жоғары қызығушылық байқалды. Форум алаңында өнеркәсіптік кооперацияны дамытуға деген айқын қызығушылық көрінді. Бір алаңда Қазақстаннан 100-ден астам компания мен Түрікменстаннан 40-тан астам бизнес өкілінің басын қоса алдық», – деді «QazTrade» АҚ экспортты дамыту жөніндегі басқарушы директоры Айнұр Әмірбекова.
Бұған дейін бірыңғай Invest in Central Asia бренді өңірдің инвестиция үшін бәсекелестіктегі мүмкіндігін арттыруға көмектесетіні хабарланған болатын. Сарапшылардың пікірінше, ірі бизнес көбіне макроөңірлерге басымдық береді, сондықтан Орталық Азияның бес елі үйлестірілген стратегияға көшуі қажет.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
