Қазақстан мен Әзербайжан көлікпен тасымалға қағаз рұқсатнамалардан бас тартады
2027 жылдан бастап екі ел халықаралық жүк тасымалында e-Permit электрондық жүйесіне толық көшеді
Қазақстан мен Әзербайжан 2027 жылдан бастап халықаралық автомобиль тасымалдарына арналған рұқсатнамалармен толықтай электрондық форматта алмасуға көшеді. Мұндай шешім Бакуде өткен аралас комиссияның отырысында қабылданды. e-Permit жүйесіне көшу бюрократиялық рәсімдерді қысқартып, жүктерді жеткізу мерзімін жеделдетуге мүмкіндік береді, деп хабарлайды Kapital.kz іскерлік ақпарат орталығы көлік министрлігінің баспасөз қызметіне сілтеме жасап.
Екі ел арасындағы тасымал көлемі тұрақты өсіп келе жатқандықтан, Қазақстан мен Әзербайжан 2026 жылға қосымша 6 мың электрондық рұқсатнамамен алмасуға келісті.
«2027 жылға арналған рұқсатнамалардың алдын ала квотасы 28 мың бірлік көлемінде келісілді. Бұл алдыңғы кезеңмен салыстырғанда 12 мыңға көп. Квотаның ұлғаюы халықаралық автомобиль тасымалдарына өсіп келе жатқан сұранысты қанағаттандыруға және Қазақстан мен Әзербайжан арасындағы сауда-экономикалық ынтымақтастықтың одан әрі дамуына ықпал етеді», – делінген хабарламада.
Еске салайық, бұған дейін elicense.kz порталында шетелдік рұқсатнама бланкілерін алуға болатын бағыттардың тізімі кеңейтілген болатын. Енді қазақстандық жүк тасымалдаушылар Әзербайжан, Түркия және Қырғызстанға кіруге арналған электрондық рұқсатнаманы онлайн рәсімдей алады. Ал Қазақстан мен Қытай шетелдік рұқсатнама бланкілерімен алмасу бойынша сандық квота белгілемейтін болды.
Отандық тасымалдаушылар қазіргі уақытта 42 мемлекетпен жасалған үкіметаралық келісімдер аясында халықаралық жүк тасымалдарын жүзеге асырады. 2025 жылы 506 мың рұқсатнама бланкісімен алмасу жүргізілсе, 2026 жылға 40 елмен 150 мың бірлік көлемінде алдын ала квота келісілді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
