Қазақстанда шегірткеге қарсы химиялық өңдеу жұмыстарының 70%-ы аяқталды
Биыл егістікті қорғау шаралары 2,2 млн гектар алқапта жүргізіледі
Қазақстанда шегіртке зиянкестеріне қарсы химиялық өңдеу жұмыстарының шамамен 1,5 млн гектары немесе болжанған көлемнің 70%-ы орындалды, деп хабарлайды Kapital.kz іскерлік ақпарат орталығы ҚР Ауыл шаруашылығы министрлігінің баспасөз қызметіне сілтеме жасап.
«Өңірлерде шегіртке зиянкестеріне қарсы химиялық өңдеу жұмыстары жалғасып жатыр. 29 маусымдағы жағдай бойынша болжанған аумақтың 70%-ы немесе шамамен 1,5 млн гектар жер өңделді. Егістікті қорғау жұмыстары жоспарға сәйкес жүргізілуде, барлық қажетті шаралар уақытылы әрі толық көлемде қабылдануда. Қорғау іс-шараларының орындалуын бақылау мақсатында қазіргі уақытта ҚР АШМ АӨК-дегі мемлекеттік инспекция комитетінің басшылығы Атырау және Маңғыстау облыстарында жұмыс істеп жатыр», – делінген министрлік хабарламасында.
Ведомствоның мәліметінше, биыл 2,2 млн гектар алқапты өңдеу жоспарланған. Бұл 2024 жылмен салыстырғанда 30%-ға аз.
Ауыл шаруашылығы министрлігінің мәліметінше, қызметтерді сатып алудың бірыңғай жүйесі енгізіліп, процестер орталықтандырылып, бюджет қаражатын пайдалану тиімділігі артқан. Желдеткіш бүріккіштердің өнімділік нормасы 100 гектардан 70 гектарға дейін төмендетілді. Соның нәтижесінде жұмылдырылған техника саны 556 бірлікке жетіп, 2025 жылмен салыстырғанда 25%-ға көбейді.
Сонымен қатар фитосанитариялық қызметтің техникалық паркі жаңартылып, 103 дрон сатып алынды. Оның ішінде 57-сі мониторинг жүргізуге, 46-сы химиялық өңдеу жұмыстарына арналған.
Шегіртке зиянкестерімен күрес тиімділігін арттыру үшін FITOCENTRE мобильді қосымшасы іске қосылды. Сондай-ақ БҰҰ-ның Азық-түлік және ауыл шаруашылығы ұйымымен (ФАО) бірлесіп цифрлық технологияларды, жасанды интеллект пен ұшқышсыз аппараттарды пайдалануға бағытталған серіктестік жоба жүзеге асырылып жатыр. Министрліктің мәліметінше, өңірлердегі жедел штабтар штаттық режимде жұмыс істеуде.
Еске салайық, бұған дейін Қазақстанда биыл шегірткеге қарсы химиялық өңдеу көлемі қысқартылатыны хабарланған болатын. Бұл мониторинг дәлдігінің артуы және зиянкестер ошақтарын жедел жоюдың нәтижесінде мүмкін болды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
