Қазақстан бюджет тапшылығын жабу үшін 464 млрд теңгеге жуық қарыз алады
Қаражат республикалық бюджеттің тапшылығын қаржыландыруға және мемлекеттік міндеттемелерді орындауға бағытталады
Депутаттар Халықаралық қайта құру және даму банкі мен Азиялық инфрақұрылымдық инвестициялар банкінен қарыз қаражатын тарту жөніндегі екі халықаралық келісімді ратификациялады. Тартылған қаражат республикалық бюджет тапшылығын қаржыландыруға және мемлекеттік міндеттемелердің орындалуын қамтамасыз етуге бағытталады, деп хабарлайды Kapital.kz іскерлік ақпарат орталығы.
Жасалған келісімдердің негізгі мақсаты – жоспарлы кезеңдегі бюджет тапшылығын уақытылы жабу. Құжаттарға сәйкес, бұл қаржыландыру мемлекетке азаматтар алдындағы әлеуметтік және экономикалық міндеттемелерді толық көлемде орындауға мүмкіндік береді.
«Қаржылық шарттарға келсек, екі халықаралық қаржы ұйымымен жасалған келісімдер өте ұқсас әрі тиімді талаптармен рәсімделген. Атап айтқанда, Азиялық инфрақұрылымдық инвестициялар банкінен тартылатын қарыз көлемі – 62,3 млрд жапон иені, ал Халықаралық қайта құру және даму банкінен алынатын екінші қарыз – 92,3 млрд жапон иені», – деді сенаттың жалпы отырысында депутат Бекболат Орынбеков.
Ұлттық валютаға шаққанда тартылатын қаражаттың жалпы көлемі шамамен 464 млрд теңгені құрайды.
Екі келісім бойынша да несиелеу шарттары бірдей. Қарыз мерзімі – 11 жыл, оның алғашқы бес жылы жеңілдік кезеңі болып есептеледі. Пайыздық мөлшерлеме халықаралық TONA индикаторына байланған. Ал несиені қызмет көрсету және игерілмеген қарыз қаражаты үшін комиссия қарыздың жалпы сомасының 0,25%-ы деңгейінде белгіленген.
Еске салайық, бұған дейін Жоғары аудиторлық палата төрағасы Әлихан Смайылов заңнамалық және басқарушылық тұрғыдан жетілдіруді қажет ететін бірқатар жүйелі кемшіліктер бар екенін айтқан болатын. Оның сөзінше, ең өзекті мәселелердің бірі – мемлекеттік органдар бюджеттерін түзетудің қазіргі тәртібі. Қолданыстағы ережеге сәйкес, бюджетті нақтыламай-ақ қаржыландыру көлемін 15%-ға дейін өзгертуге болады. Алайда іс жүзінде әрбір кейінгі түзету жаңартылған сома негізінде есептеліп, бір жыл ішінде қаражатты бірнеше рет қайта бөлуге мүмкіндік береді. Соның салдарынан жекелеген бюджеттік бағдарламалар бойынша өзгерістер көлемі бастапқыда бекітілген ассигнованияның 90%-ына дейін жеткен. ЖАП мұндай тәжірибе парламент бекіткен бюджет параметрлерін іс жүзінде өзгертіп жібереді деп есептеп, түзетулерге қосымша шектеулер енгізуді және парламенттік бақылауды күшейтуді ұсынған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
