• Басты бет
• Экономика
• Қазақстанда Қытайдан әкелінетін ЖЖМ-ға салынатын кедендік баж салығы алынуы мүмкін

Қазақстанда Қытайдан әкелінетін ЖЖМ-ға салынатын кедендік баж салығы алынуы мүмкін

Елде жанар-жағармай тапшылығы туындаған жағдайда бензинді шұғыл жеткізу механизмін құру жоспарланып отыр

Қазақстан Еуразиялық экономикалық одаққа мүше емес елдерден келетін жанар-жағармай материалдарына салынатын импорттық баж салығын уақытша алып тастау (нөлге теңестіру) мүмкіндігін қарастыруда. Мұндағы негізгі назар Қытайдан келетін өнімдерге аударылып отыр. Бұл ел сұраныс артқан немесе мұнай өнімдерінің жекелеген түрлері тапшы болған кезеңде ішкі нарықты жанар-жағармаймен қамтамасыз ететін қосымша көзге айналуы мүмкін. Бұл туралы Сенатта Сауда және интеграция вице-министрі Жанель Кушукова мәлімдеді, деп хабарлайды Kapital.kz іскерлік ақпарат орталығының тілшісі.

Вице-министр ұзақ жылдар бойы Қазақстан үшін жанар-жағармайдың негізгі сыртқы жеткізушісі Ресей болып келгенін, алайда нарықтағы қазіргі жағдай импорт бағыттарын кеңейтуді талап ететінін атап өтті.

«Біз үшінші елдерден, ең алдымен Қытайдан жанар-жағармай әкелуді ынталандыру мақсатында Еуразиялық экономикалық комиссияда импорттық кеден бажын төмендету туралы шешім қабылдап жатырмыз», — деді Жанель Кушукова Сенаттың жалпы отырысында.

Оның айтуынша, талқыланып жатқан шаралар бензин, дизель және авиация отынына қатысты. Мұнай өнімдерінің бұл түрлері үшін импорттық баж салығының мөлшерлемесі нөлдік деңгейге дейін төмендетілуі мүмкін.

Министрлік бұл ретте алдын ала белгіленген көлемде ауқымды сатып алулар жасау туралы сөз болып отырмағанын баса айтты. Бастаманың басты мақсаты — өзге елдерден жеткізілетін өнімдер есебінен ықтимал тапшылықтың орнын шұғыл толтыруға мүмкіндік беретін құқықтық және экономикалық жағдай жасау.

«Біз қандай да бір көлем жетіспей қалса, үшінші елдерден отын әкелу мүмкіндігін қарастырып жатырмыз. Мысалы, авиация отыны. Өзіміздің кен орындарымыз бен өндірісіміз болса да, елді авиация отынымен толық қамтамасыз ету деңгейі әлі де жеткіліксіз», — деп түсіндірді ол.

Ж. Кушукова импорттың нақты көлемі алдын ала белгіленбейтінін нақтылады. Өнім ішкі нарықтың нақты қажеттілігі мен отын қорының ағымдағы жағдайына қарай жеткізіледі деп жоспарлануда.

Сонымен қатар, Қазақстанда мұнай өнімдерін экспорттауға қойылған шектеулер күшінде қалады. Мұндай шаралар әр алты ай сайын ұзартылып тұрады және олар отандық тұтынушылардың сұранысын бірінші кезекте өтеуге бағытталған. Алдын ала болжам бойынша, ЖЖМ-ны бажсыз әкелу режимі бір жыл мерзімге енгізілуі мүмкін.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз