• Басты бет
• Әлемде
• Британдық Frasers Group компаниясы Hugo Boss брендін $2,3 млрд толық сатып алуды жоспарлап отыр

Британдық Frasers Group компаниясы Hugo Boss брендін $2,3 млрд толық сатып алуды жоспарлап отыр

Компания бір акция үшін 38 еуро ұсынды, алайда мәміленің жүзеге асу-аспасы әзірге белгісіз

Германиялық киім және аксессуарлар өндірушісі Hugo Boss компаниясының 26 пайыздық үлесіне иелік ететін британдық Frasers Group инвестициялық холдингі брендтің қалған акцияларын шамамен 2 млрд еуроға сатып алуды көздейді. Бұл туралы «Интерфакс-Қазақстан» агенттігі хабарлады.

Frasers Group неміс сән үйінің акционерлеріне әр бағалы қағаз үшін қолма-қол 38 еуродан төлеуді ұсынды. Бұл сейсенбі күнгі сауда-саттықтың жабылуындағы акция құнынан шамамен 4 пайызға жоғары. Осы оферта аясында компанияның жалпы құны 2,7 млрд еуроға бағаланып отыр.

Hugo Boss өкілдері мұндай ұсыныстың түскенін растап, оны мұқият зерделейтінін мәлімдеді.

Bloomberg сарапшысы Чарльз Аллен Frasers Group компаниясының бұл қадамын «ыңғайлы сәтті пайдаланып қалу әрекеті» деп атады. Оның пікірінше, ұсынылған үстемеақының аздығын ескерсек, акционерлердің бұл мәмілені мақұлдауы екіталай.

Сарапшының пайымдауынша, неміс сән бренді қазіргі уақытта Қытайдағы сұраныстың бәсеңдеуі мен әйелдер киімі сегментіндегі сауданың нашарлауынан туындаған дағдарыстан шығуға тырысып жатыр. Алайда, Frasers Group-тың брендті қайта оңалтуды жеделдету үшін қандай тетіктерді қолдана алатыны түсініксіз.

Лондондағы Gieves & Hawkes ательесінің, House of Fraser премиум-универмагтар желісінің, Sports Direct ритейлерінің, сондай-ақ бірнеше спорттық және сән брендтерінің иесі саналатын Frasers Group көп жылдан бері Hugo Boss өнімдерін өзінің дүкендері мен онлайн-платформалары арқылы сатып келеді. Сонымен қатар Frasers Group өкілі Hugo Boss компаниясының байқаушы кеңесінің құрамына кіреді.

Германиялық компанияны толық бақылауға алу Frasers Group-қа оның стратегиясын айқындауға және капиталды бөлуге қатысты шешімдер қабылдауға мүмкіндік береді. Айта кетейік, өткен жылы британдық инвестор мен Hugo Boss басшылығы арасында келіспеушілік туындаған болатын. Сонда Frasers Group дивиденд төлеуге қарсы дауыс беретінін мәлімдеген еді, өйткені олар бұл қаражатты бизнесті дамытуға бағыттау әлдеқайда тиімді деп есептейді.

Бейсенбі күнгі сауда-саттықтың басында Лондонда Frasers Group акцияларының бағасы 1,7 пайызға төмендесе, Франкфуртте Hugo Boss бағалы қағаздары 6,3 пайызға қымбаттады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз