- Басты бет
- Технологиялар
- Қазақстанда «Quantum AI» алғашқы кванттық зертханасы ашылды
Қазақстанда «Quantum AI» алғашқы кванттық зертханасы ашылды
Онда елдегі тұңғыш кванттық компьютерлер бар
Әл-Фараби атындағы Қазақ ұлттық университетінде «Quantum AI» зертханасы іске қосылды, деп хабарлайды Kapital.kz іскерлік ақпарат орталығы Ғылым және жоғары білім министрлігіне сілтеме жасап.
Ауқымды жоба алдыңғы қатарлы кванттық жүйелерді өндіруге маманданған SpinQ Technology (ҚХР) халықаралық технологиялық компаниясының қолдауымен жүзеге асырылды.
Жаңа орталыққа заманауи жеті кванттық есептеу жүйесі жеткізілді. Бүгінгі таңда бұл – Қазақстан аумағындағы жалғыз кванттық компьютерлер. Бірегей жабдықтар студенттер мен ізденушілерге оқу сабақтары мен зертханалық жұмыстарды жоғары деңгейде жүргізуге, күрделі ғылыми-зерттеу жобаларын орындауға және машиналық оқытудың бірегей алгоритмдерін әзірлеуге мүмкіндік береді.
«Қазіргі уақытта жасанды интеллект, үлкен деректер мен кванттық есептеулер әлемдік ғылым мен экономиканың жаңа бағытын айқындап отыр. Кванттық технологиялар мен ЖИ интеграциясы криптография, медицина және күрделі жүйелерді модельдеу саласындағы бұрын классикалық компьютерлердің қауқары жетпеген ең күрделі міндеттерді шешуге жол ашады», - деді ҚазҰУ ректоры Жансейіт Түймебаев.
Ақпараттық технологиялар және жасанды интеллект факультетінің деканы Тимур Иманқұловтың айтуынша, отандық мамандар озық жабдықтармен жұмыс істеуге толық дайын.
Жаңа зертхана жоғары курс студенттеріне тәжірибелі тәлімгерлермен бірлесіп, нақты өндірістік жобаларға қатыса алатын ашық платформа ретінде қызмет етеді. Бұл база факультет түлектерінің халықаралық еңбек нарығындағы бәсекеге қабілеттілігін айтарлықтай арттырады.
Шарада көпшілікке «Quantum AI»зертханасының және машиналық оқытудың бірегей алгоритмдерін әзірлеу жоспарлары кеңінен таныстырылды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
