Amanat пен Әділет партиялары бірігеді
Amanat өкілдері бұл шешімнің себебін түсіндірді
Amanat партиясы Әділет партиясымен бірігу бастамасын қолдады. Бұл маңызды шешім Amanat партиясының кезекті XXVI Съезінде белгілі болды, деп хабарлады Kazinform.
Павлодар облыстық мәслихатының төрағасы Илья Теренченко бұл қадамның уақыт талабы екенін атап өтті. Оның айтуынша, партиялардың бірігуі елді дамытудың стратегиялық міндеттерін орындауға септігін тигізеді.
«Бұл — мемлекеттің тұрақты дамуын қамтамасыз ететін оңтайлы қадам. Мемлекет басшысы белгілеген реформаларды сәтті жүзеге асыру үшін жалпыұлттық құндылықтар төңірегіне топтасуымыз керек. Осылайша біз жинақталған тәжірибеміз бен қоғамдық әлеуетті Әділетті Қазақстанды құру жолына жұмылдыра аламыз», — деді Илья Теренченко.
Amanat партиясының төрағасы Ерлан Қошанов бұл саяси бірлесу ұйым дамуының жаңа кезеңі болатынын мәлімдеді.
«Ескі көзқараспен жаңа қоғам құру мүмкін емес. Ашығын айту керек, халықпен тығыз байланыс орнатсақ та, қоғам санасында партияның өткеніне қатысты түрлі пікірлер әлі де бар. Бұл — үлкен тарихы бар кез келген саяси күшке тән құбылыс», — деді партия жетекшісі.
Ерлан Қошановтың пайымдауынша, қазіргі таңда елге жікке бөліну емес, ауызбіршілік қажет. Ол партияның «өзгеріс өзімізден басталады» деген ұстанымға адал екенін жеткізді.
«Бүгін, дамудың жаңа бағытына бет бұрған шақта, Мемлекет басшысы ауызбіршіліктің маңыздылығы туралы айтып жатқанда, өз тарихымыздың жаңа парағын ашуға батылдығымыз жетуі керек. Біздің партия әрқашан «өзгеріс өзімізден басталады» деген ұстанымды қолдап келді. Сондықтан дәл қазір де уақыт талабына, мемлекет мүддесі мен қоғам сұранысына сай келетін қадам жасауымыз қажет. Бүгінде елге жаңа жікшілдік сызықтар емес, біріктіретін жаңа тоғысу нүктелері керек. Осындай жауапты сәтте біз жұдырықтай жұмылып, өз ресурстарымызды жаңа күшпен ұштастыруымыз қажет», — деді Ерлан Қошанов.
Еске сала кетейік, бұған дейін Астанада «Әділет» партиясының кезектен тыс съезі 14 маусымға жоспарланғаны хабарланған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
