Түркістан облысында Куршевельге ұқсас курорт салынбақ
Қасқасу тауларында қытайлық инвесторлармен бірлесіп, бірегей цифрлық шипажай салу жоспарланып отыр
Түркістан облысының Қасқасу тауларында әлемдік деңгейдегі экологиялық тау шипажайы қалашығы бой көтермек. Облыс әкімі Нұралхан Көшеров пен тау туризмі және шипажай инфрақұрылымы саласындағы қытайлық компания басшылығы бірегей жобаның тұжырымдамасын талқылады. Бұл туралы әкімдіктің баспасөз қызметіне сілтеме жасап Kapital.kz іскерлік ақпарат орталығы хабарлайды.
«Теңіз деңгейінен 3200 метр биіктіктегі тау беткейлерінде әлемде теңдесі жоқ бірегей экологиялық рекреациялық аймақ құрылады. Шипажай аумағында мұз пішінді ерекше қонақүйлер, отбасылық демалыс орындары, бизнес-кластерлер, ойын-сауық және спорт нысандары орналасады. Жобаның басты ерекшелігі – толығымен экологиялық таза технологиялар мен табиғи материалдардың қолданылуы. Нысандардың басым бөлігі тас пен ағаштан тұрғызылады. Мұндай тәсіл табиғи ландшафты сақтап қана қоймай, өңірдің өзіндік ерекше келбетін қалыптастыруға мүмкіндік береді. Шипажай бірнеше функционалдық аймаққа бөлінеді. Туристерге қолайлы жағдай жасау үшін заманауи аспалы жолдар тартылып, жыл бойы жұмыс істейтін нысандар қарастырылған», - деп мәлімдеді әкімдіктен.
Сонымен қатар шипажай аумағында сыйымдылығы шамамен 3 млн текше метр болатын су қоймалары жүйесін салу көзделіп отыр.
Болашақ демалыс орнындағы барлық қызметтер цифрлық технологиялар арқылы басқарылады. Ал жасанды интеллект туристер ағынын реттеу, қауіпсіздікті қамтамасыз ету, энергия тиімділігін арттыру және қызмет көрсету сапасын жақсарту үшін қолданылмақ.
«Сарапшылардың пікірінше, бұл жоба Қазақстандағы ең жоғары технологиялық туристік нысандардың біріне айналуы мүмкін. Мамандар Қасқасу жобасын танымал француз шипажайы Куршевельмен салыстырып, оны отандық баламасы деп бағалап отыр», - деп атап өтті баспасөз қызметі.
Құрылыс кезеңінде және нысан іске қосылғаннан кейін 10 мыңға жуық жаңа жұмыс орнын ашу көзделген.
«Біздің басты мақсатымыз – тарихи, мәдени және табиғи артықшылықтарды тиімді пайдалана отырып, Түркістанды халықаралық туризм орталығына айналдыру. Бұл ретте Қасқасу жобасының маңызы ерекше. Бұл — жай ғана демалыс орны емес, өңір экономикасына серпін беретін, мыңдаған жұмыс орнын ашатын, инвестиция тартып, Түркістанның жаңа брендіне айналатын ауқымды жоба. Ең бастысы, жоба табиғатты сақтай отырып және заманауи технологияларды енгізу арқылы тұрақты туризм қағидаттарына негізделген. Бұл бастама тек Түркістан облысының ғана емес, бүкіл Қазақстанның туристік әлеуетін жаңа деңгейге көтереді», – деді облыс әкімі.
Айта кетейік, әкімдік шипажай құрылысымен айналысатын қытайлық компанияның атауын нақтыламады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
