Электромобильдер Қазақстан автонарығының небәрі 0,5 пайызын құрады
Елде электрлі қозғалтқышпен жүретін 32 479 көлік тіркелген
Қазақстанда электрлі қозғалтқышпен жүретін 32 479 көлік құралы ресми түрде тіркелген, бұл елдегі жалпы автопарктің 0,5 пайызына тең. Ұлттық статистика бюросының маусым айының басындағы мәліметі бойынша, Алматы қаласы электромобильдер саны жағынан көш бастап тұр. Бұл туралы ҰСБ деректеріне сілтеме жасап Kapital.kz іскерлік ақпарат орталығының тілшісі хабарлайды.
2026 жылғы 1 маусымдағы мәлімет бойынша, Қазақстанда барлығы 5 995,0 мың автокөлік тіркелген. Оның ішінде 84,2%-ы – жеңіл автомобильдер, 8,0%-ы – жүк көліктері, 4,3%-ы – тіркемелер, 1,5%-ы – автобустар, 1,2%-ы – мотоциклдер және 0,8%-ы – басқа да көлік түрлері.
Көліктердің пайдаланатын отын түрлері төмендегідей бөлінген:
• Көліктердің 80%-ы бензинмен жұмыс істейді;
• 7,6%-ы дизель отынын пайдаланады;
• 6,5%-ы аралас отынмен жүреді;
• 0,4%-ы газ баллонды көліктер;
• 0,5%-ы – электромобильдер.
Қазақстандағы электрлі көлік паркінің негізгі бөлігі төрт өңірде шоғырланған. Алматыда 17 506, Астанада – 3 235, Алматы облысында – 2 857, ал Шымкентте 1 042 электрокар тіркелген.
2026 жылдың мамыр айында 147,7 мың автокөлік есепке қойылды. Оның ішінде: 129,0 мың жеңіл автомобиль, 8,7 мың жүк көлігі, 1,3 мың автобус, 1,6 мың мотоцикл, 3,6 мың тіркеме және 3,3 мың көліктің басқа да түрлері бар.
Статистика Ішкі істер министрлігінің мәліметтері негізінде дайындалған.
Еске сала кетсек, Мәжілісте электромобильдер үшін бөлек мемлекеттік тіркеу нөмірлерін енгізу және қалаларда қозғалтқышты ұзақ уақыт бойы қыздыруға қойылған шектеуді алып тастауды көздейтін бірден екі маңызды бастама талқыланып жатыр.
Айта кетейік, 2025 жылы Қазақстанда бір жыл ішінде электромобильдер саны 57,3%-ға артқаны хабарланған болатын. Электрокарлардың ең көп саны Алматыда тіркелді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
