Есіл су реттегішінің құрылысы 2027 жылы басталады
Бұл гидротехникалық нысан Ақмола және Солтүстік Қазақстан облыстарын су тасқынынан қорғау үшін қажет
Ақмола және Солтүстік Қазақстан облыстарын су тасқынынан қорғауға арналған Есіл су реттегішінің құрылысы келесі жылы басталады. Бұл туралы Су ресурстары және ирригация министрі Нұржан Нұржігітовтің көшпелі жиыны барысында мәлім болды, деп хабарлайды Kapital.kz іскерлік ақпарат орталығы.
«Өткен жылдың қазан айында Солтүстік Қазақстан және Ақмола облыстарының елді мекендерін су тасқынынан қорғауға бағытталған жоба мемлекеттік сараптамадан өтті. Су реттегіштің жалпы сыйымдылығы — 873,41 млн текше метр, ал бөгеттің ұзындығы 3 443 метр болады. Құрылыс-монтаждау жұмыстарын келесі жылы бастау жоспарланып отыр», — деп хабарлады Су ресурстары және ирригация министрлігі.
Бұл нысан тасқын суын ұстап тұруға және оның Есіл өзенінің төменгі ағысымен қауіпсіз өтуін реттеуге мүмкіндік береді. Осылайша, СҚО-дағы Сергеев және Петропавл су қоймаларының тұрақты жұмысы қамтамасыз етіліп, өзен жайылмасының экологиялық жағдайы жақсарады. Бұдан бөлек, су реттегіш Ақмола облысындағы 25 мың гектар суармалы жерді сумен қамтамасыз етуге жағдай жасайды.
Нұржан Нұржігітов Есіл су реттегіші салынатын орынға барып, дайындық жұмыстарының барысын тексерді.
«Бұл — Су ресурстарын басқару жүйесін дамыту тұжырымдамасы аясында жүзеге асырылып жатқан стратегиялық маңызы бар жоба. Оның ауқымы мен Ақмола және Солтүстік Қазақстан облыстарының қауіпсіздігін қамтамасыз етудегі маңыздылығын ескере отырып, жоспарланған барлық жұмыстардың сапалы әрі уақтылы орындалуын ұйымдастыру қажет. Бұл нысан Мемлекет басшысының тасқын суын жинау және оны тиімді пайдалану жөніндегі тапсырмасын орындаудағы негізгі қадам болады», — деп атап өтті су ресурстары және ирригация министрі.
Ақмола облысына жасаған сапары барысында Нұржан Нұржігітов Покровка жер асты су кен орнынан Целиноград ауданының Талапкер және Қажымұқан ауылдарына дейінгі су құбыры құрылысының барысын да көрді. Бүгінгі таңда мердігер ұйым жобада қарастырылған 19 ұңғыманың барлығын бұрғылап бітті, жоспарланған 86,5 шақырым құбырдың 83,5 шақырымы төселді, электрмен жабдықтауға арналған 597 темірбетон тіректің 437-сі орнатылды.
Қазіргі уақытта нысанда бірінші және екінші деңгейлі сорғы станцияларының, су тазарту станциясының, сондай-ақ бастапқы және таза су резервуарларының құрылысы жүріп жатыр. Барлық құрылыс-монтаждау жұмыстарын ағымдағы жылдың соңына дейін аяқтау көзделіп отыр. Жоба іске асқанда Талапкер, Қажымұқан және Төңкеріс ауылдары орталықтандырылған су жүйесіне қосылады, сондай-ақ Арайлы ауылының сумен жабдықталуы жақсарады.
Бұдан кейін министр Сандықтау ауданына барып, Красная поляна, Петриковка және Арбузинка ауылдарын сумен қамтамасыз ету жүйесінің құрылысын көрді. Бүгінде жоба аясында 22,1 шақырым құбырдың барлығы тартылып, су жинау құрылысы мен екі су құбыры нысанының алаңы салынды. Қосымша екі ұңғыманы бұрғылау жұмыстары жүргізілуде. Жобаны осы жылы аяқтау жоспарланған.
Сондай-ақ Нұржан Нұржігітов Жабай өзеніндегі жұмыстардың барысымен танысты. Бүгінгі таңда 7,3 шақырымды құрайтын учаскеде өзен арнасын 120 метрге дейін кеңейту және түбін 3 метрге дейін тереңдету жұмыстары толықтай орындалды. Алдағы уақытта жерснарядтарды (су түбін тереңдететін техникаларды) қолдана отырып, еңістерді тегістеу және өзен түбін қосымша 1,5 метрге тереңдету жұмыстары жоспарлануда.
Бұл жоба Ақмола облысында су тасқыны кезеңінің қауіпсіз өтуін қамтамасыз ету үшін Жабай өзенінің су өткізу қабілетін арттыруға бағытталған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
