Астанада шетелдіктерге заңсыз ЖСН берген қылмыстық топ қолға түсті
Сәйкестендіру нөмірлері шетел азаматтарының өзі келмей-ақ рәсімделіп отырған
Астанада шетелдіктерге жеке сәйкестендіру нөмірлерін (ЖСН) заңсыз берумен айналысқан жемқорлық схемасы әшкереленді. Бұл туралы Kapital.kz іскерлік ақпарат орталығы Қаржылық мониторинг агенттігінің баспасөз қызметіне сілтеме жасап хабарлайды.
«ҚМА-ның елордалық департаменті мемлекеттік органдардың ақпараттық жүйелерін пайдалана отырып, шетелдіктерге ЖСН-ді заңсыз рәсімдеп келген қылмыстық схеманың жолын кесті. Заң бойынша, шетел азаматтары ЖСН алу үшін елге өзі келіп, міндетті биометриялық тексерістен өтуі тиіс. Алайда, 2024–2025 жылдары өтініш берушілерді елге келтірмей-ақ, ЖСН алып беріп отырған қылмыстық топ жұмыс істеген», — деп мәлімдеді ҚМА.
Агенттік мәліметінше, күдіктілер шетелдік клиенттерді әлеуметтік желілердегі арнайы арналар арқылы тауып отырған.
«Бұл қылмысқа «Азаматтарға арналған үкімет» мемлекеттік корпорациясы» Астана қаласы филиалының қызметкерлері араласқан. Олар ХҚКО жүйесіне жалған мәліметтер енгізіп, ЖСН алуға өтінімдерді өздері толтырған. Ал қызмет ақысы делдалдар арқылы банктік аударыммен түсіп, схемаға қатысушылар өзара бөлісіп отырған», — делінген хабарламада.
Қазір қылмыстық іс сотқа жолданды. Тергеу мүддесіне байланысты өзге ақпарат жарияланбайды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
