Цифрлық теңге айналымы 1 триллион теңгеге жетеді
Ұлттық банк цифрлық валютаның мемлекеттік қаржыдағы қолдану аясын кеңейтіп, Ұлттық қор активтерін басқару стратегиясын өзгертеді
Ұлттық банк төрағасы Тимур Сүлейменов 2026 жылдың соңына қарай цифрлық теңгемен жасалатын операциялар көлемін 1 триллион теңгеге дейін жеткізу жоспарланып отырғанын мәлімдеді, деп хабарлайды Kapital.kz іскерлік ақпарат орталығының тілшісі.
«Биыл біз мемлекеттік қаржы жүйесінде цифрлық теңгені қолдану аясын кеңейтіп жатырмыз. Үкіметпен бірлесіп тиісті жол картасы бекітілді. Цифрлық теңге айналымын 1 триллион теңгеге дейін жеткізуді көздеп отырмыз», - деді Тимур Сүлейменов Сенаттың жалпы отырысында.
Оның айтуынша, бүгінгі таңда айналымға шамамен 340 миллиард цифрлық теңге шығарылған.
Бұдан бөлек, Ұлттық банк басшысы Ұлттық қордың инвестициялық стратегиясын өзгерту жоспарларына тоқталып өтті. Реттеуші портфель құрылымын қайта қарап, табыстылығы жоғары құралдардың үлесін арттыруды көздейді.
«Биыл біз Ұлттық қор активтерін нысаналы бөлудің жаңа үлгісіне көшуді жоспарлап отырмыз. Акциялар мен баламалы құралдар сияқты жоғары табысты активтердің үлесі ұлғайтылады. Бұл Ұлттық қордың кірісіне оң әсер етеді», - деп мәлімдеді Тимур Сүлейменов.
Ұлттық банк активтерді басқарудың жаңартылған тәсілі Ұлттық қордың елдегі басты қаржылық резерв ретіндегі рөлін сақтай отырып, оның ұзақ мерзімді табыстылығын арттыруға мүмкіндік береді деп күтеді.
Еске сала кетейік, Қаржы министрлігі арнайы бұйрықпен республикалық және жергілікті бюджеттерде цифрлық теңгені қолдану аясын кеңейтуге бағытталған пилоттық жобаны жүзеге асыру ережелерін бекітті. Пилоттық жоба 27 маусымда басталып, 2026 жылдың 31 желтоқсанына дейін жалғасады.
Бұған дейін цифрлық теңгені кем дегенде 100 мемлекеттік жобаны жүзеге асыру кезінде енгізу көзделіп отырғаны хабарланған болатын. Жыл соңына дейін қазынашылық жүйелерін виртуалды валюта платформасымен біріктіру моделін әзірлеу жоспарлануда. 2025 жылдың қыркүйегінде Қазақстанда цифрлық теңге ресми түрде ұлттық валюта мәртебесіне іс жүзінде ие болатыны хабарланды. Сол жылдың шілдесінде Қазақстанда айналымға 257,5 миллиард цифрлық теңге енгізілгені белгілі болды. 2024 жылдың шілдесінде Қазақстан Республикасында Ұлттық қор қаражатын цифрлық теңге платформасы арқылы пайдалану жөніндегі пилоттық жоба басталған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
