• Басты бет
• Экономика
• Мемлекет Сергей Кан мен Александр Клебановтың энергетикалық активтерінің бірін бақылауға алды

Мемлекет Сергей Кан мен Александр Клебановтың энергетикалық активтерінің бірін бақылауға алды

«Павлодар жылу желілері» Павлодар әкімдігінің меншігіне өтті

Ірі кәсіпкерлер Сергей Кан мен Александр Клебанов өздеріне тиесілі «Павлодар жылу желілері» компаниясының 100% үлесін Павлодар қаласы әкімдігінің «Павлодар қаласының тұрғын үй инспекциясы және коммуналдық шаруашылық бөлімі» мемлекеттік мекемесіне берді. Бұл туралы Kapital.kz іскерлік ақпарат орталығы хабарлайды.

Kompra сервисінің деректеріне сәйкес, активті мемлекет меншігіне беру 2026 жылғы 26 қаңтарда рәсімделген.

Мәмілеге дейін «Павлодар жылу желілері» ЖШС-нің иелері «ПАВЛОДАРЭНЕРГО» АҚ арқылы Сергей Кан мен Александр Клебанов болған. Аталған акционерлік қоғам «Орталық Азия электр энергетикалық корпорациясының» (ОАЭК) құрамына кіреді.

Бұған дейін ОАЭК құрылымына кіретін «СЕВКАЗЭНЕРГО» АҚ-ның 2024 жылға арналған қаржылық есебінде 2025 жылы «Петропавл жылу желілері» ЖШС-нің 100% үлесін Петропавл әкімдігінің пайдасына беру жоспарланғаны айтылған. Ол кезде мәміле құны әлі анықталмағаны хабарланған еді.

ОАЭК тобы активтеріндегі трансформация 2022 жылғы қараша айының соңында болған Екібастұз жылу электр орталығындағы ірі апаттан кейін басталды. Бірнеше қазандық агрегаты істен шығып, 30 градустық аязда қаланың бір бөлігі жылу мен ыстық сусыз қалған болатын.

Кейін президент Қасым-Жомарт Тоқаев премьер-министрге елдегі проблемалы энергетикалық активтерді мемлекет меншігіне қайтару мәселесін қарастыруды тапсырды.

«Энергетикалық активтерді басқару сапасының төмендігінен апаттар болып, тұтынушыларға электр энергиясын беру тоқтап жатыр», — делінген президенттің баспасөз хатшысы таратқан хабарламада.

Өз кезегінде мәжілісте магистральдық желілердің қатты тозуына назар аударылды.

«Мысалы, Екібастұзда желілердің 91%-ы тозған. ЖЭО-ларды күрделі жаңғырту процесі жоқ, бұл инфрақұрылымға инвестиция жетіспейді», — деген еді мәжілісмен Ерлан Сайыров.

«Стратегиялық нысандарды түрлі күмәнді жолдармен иеленіп алған олигархиялық топтар ондаған жыл бойы халықтың байлығын пайдаланып, пайда тапты. Бірақ ел бойынша магистральдық желілер мен ЖЭО-ларды жаңғыртуға қаржы салғысы келмейді. Бұл азаматтар мен мемлекетке қатысты әділетсіздік. Олар сүліктей сорып, енді мәселені мемлекет пен халықтың мойнына артқысы келеді», — деді депутат.

Кейінірек «Орталық Азия электр энергетикалық корпорациясының» ірі акционерлерінің бірі Александр Клебанов «Екібастұзжылуэнергоны» мемлекетке 1 теңгеге беруге дайын екенін мәлімдеді. Оның айтуынша, компания бірнеше жыл бойы Екібастұз ЖЭО-сын қала балансына өткізуді ұсынып келген.

2024 жылы «Екібастұзжылуэнерго» ЖШС-нің мүлкі Екібастұз әкімдігінің меншігіне берілді. Олардың баланстық құны 5,3 млрд теңгеге бағаланған.

«Орталық Азия электр энергетикалық корпорациясы» сайтының мәліметінше, компания акцияларының 47,1%-дан Сергей Кан мен Александр Клебановқа тиесілі. KIF ENERGY S.A.R.L. — 4,02%, ал 1,78% — «Орталық Азия отын-энергетикалық компаниясы» АҚ-ның үлесінде.

ОАЭК-тің өңірлердегі еншілес кәсіпорындары екі тігінен ықпалдастырылған энергетикалық компаниядан тұрады: «СЕВКАЗЭНЕРГО» АҚ және «ПАВЛОДАРЭНЕРГО» АҚ. Олар энергия өндіру, тасымалдау және сатудың барлық тізбегін қамтиды. Ал Ақмола облысында топ құрылымына «Ақмола электр желілерін тарату компаниясы» АҚ мен «Павлодар-Водоканал Северный» ЖШС кіреді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз