• Басты бет
• Экономика
• 2040 жылға қарай Қазақстандағы жұмыспен қамтылғандар саны 2 млн адамға жуық өсуі мүмкін – ЕТДҚ

2040 жылға қарай Қазақстандағы жұмыспен қамтылғандар саны 2 млн адамға жуық өсуі мүмкін – ЕТДҚ

Қорда еңбек нарығындағы өзгерістер аясында жаңа жұмыс орындарын ашу қажеттігі айтылды

ЕАЭО елдерінің еңбек нарығы экономикалық өсімнің жеделдеуі, демографиялық өзгерістер және цифрлық технологиялардың дамуы аясында құрылымдық трансформация кезеңінен өтіп жатыр. Орталық Азия елдері үшін ұзақмерзімді негізгі сын-қатерлердің бірі – жұмыс күшінің артуы және жаңа жұмыс орындарын құру қажеттігі. Бұл туралы Еуразиялық экономикалық форум аясында Еуразиялық тұрақтандыру және даму қорының (ЕТДҚ) бас экономисі Сергей Улатов «Цифрлық құралдарды пайдалану арқылы ЕАЭО еңбек ресурстары нарығын дамыту» атты панельдік сессия барысында айтты, деп хабарлайды Kapital.kz іскерлік ақпарат орталығы қордың баспасөз қызметіне сілтеме жасап.

«Біздің бағалауымыз бойынша, 2040 жылға қарай Қазақстанда жұмыс күші ұсынысы шамамен 2 млн адамға, Қырғызстанда – шамамен 1 млн адамға, Тәжікстанда 2 млн адамнан астам көрсеткішке артуы мүмкін. Бұл экономиканың формалды секторын дамытуға және жаңа жұмыс орындарын құруға елеулі сұраныс қалыптастырады», – деді Сергей Улатов.

Оның айтуынша, өңір экономикалары жоғары экономикалық белсенділік көрсетіп отыр. Алайда ЕТДҚ зерттеуінің нәтижелері еңбек нарығының экономикалық өсімге реакциясы шектеулі болғанын көрсетті.

«Соңғы бірнеше жылдағы ЖІӨ өсімі негізінен жұмыспен қамтудың артуына емес, жалақы мен халық табысының өсуіне әсер етті», – деді қордың бас экономисі.

Ол өңір елдерінде еңбек ресурстарының қызмет көрсету секторына ауысуы жалғасып жатқанын, ал өнеркәсіптегі жұмыспен қамтылғандар үлесі айтарлықтай баяу өсіп жатқанын атап өтті. Сонымен қатар бейресми сектордағы жұмыспен қамтудың жоғары деңгейі сақталып отыр.

«Қазақстанда да, өңірдің бірқатар елдеріндегі сияқты, ауыл шаруашылығындағы жұмыспен қамту біртіндеп қысқарып, қызмет көрсету секторындағы жұмыспен қамту өсіп келеді. Бұл ретте еңбек өнімділігін арттыру және заманауи, жоғары өнімді жұмыс орындарын құру негізгі міндетке айналады», – деді Сергей Улатов.

Оның мәліметінше, ЕТДҚ Армения, Қазақстан, Қырғызстан және Тәжікстанның еңбек нарығына арналған алғашқы флагмандық баяндамасын дайындап жатыр. Зерттеу демографиялық өзгерістер, жұмыспен қамтудың құрылымдық трансформациясы, бейресми сектор, еңбек өнімділігі, цифрландыру мен жасанды интеллектінің өңір еңбек нарығына ықпалы мәселелерін қамтиды.

Жобаның қорытынды нәтижелері 2026 жылғы 29 қазанда Астанада өтетін ЕТДҚ халықаралық экономикалық конференциясында таныстырылады.

Бұған дейін еңбек және халықты әлеуметтік қорғау министрі Асқарбек Ертаев Қазақстанда жұмыспен қамту жүйесін қалай трансформациялау жоспарланып отырғанын айтқан болатын. Министрдің сөзінше, 2035 жылға қарай жасанды интеллект Қазақстандағы барлық мамандықтың жартысына жуығына әсер етеді. Ал бірінші тоқсан қорытындысы бойынша елдегі жұмыссыздық деңгейі 4,5%-ды құрады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз