• Басты бет
• Экономика
• Қазақстанда ірі тұтынушылық даулар бойынша 196 млн теңгеге азаматтардың құқығы қорғалды

Қазақстанда ірі тұтынушылық даулар бойынша 196 млн теңгеге азаматтардың құқығы қорғалды

Тұтынушылардың құқықтарын қорғау комитеті резонанс тудырған істер статистикасын жариялады

2026 жылдың бірінші тоқсанында Тұтынушылардың құқықтарын қорғау комитеті ірі даулар бойынша ондаған азаматтың мүддесін қорғап, жалпы сомасы 196 млн теңгеден астам қаражаттың қайтарылуын қамтамасыз етті. Бұл туралы ОКҚ алаңында комитет төрағасы Болат Танабергенов мәлім етті, деп хабарлайды ortcom.kz.

Оның айтуынша, ведомство құқықтық сауаттылықты арттыру мақсатында келтірілген залал көлемі мен құқықбұзушылықтың жаппай сипатына қарай мұндай істердің арнайы есебін жүргізеді.

Мұндай істер үш негізгі критерий бойынша айқындалады:

- келтірілген шығын көлемі 5 млн теңгеден асады;

- бір мәселе бойынша бес және одан көп тұтынушының құқығы қорғалады;

- азаматтардың құқықтары жаппай бұзылған жағдайда тұтынушылардың белгісіз тобының мүддесін қорғау үшін сотқа талап арыз беріледі.

«Биылғы алғашқы үш айдың қорытындысы бойынша «тұтынушыларға қайтарылған қаражат көлемі кемінде 5 млн теңге» критерийі аясында 18 тұтынушының құқығы қорғалды. Тауарларды қайтару, айырбастау және ауыстыру бойынша жалпы 190 млн теңге өтелді. «Бір мәселе бойынша құқығы қорғалған тұтынушылар саны бес адамнан көп» критерийі бойынша алты резонанстық іс қаралып, 31 тұтынушының құқығы қорғалды, 4,2 млн теңге өтелді. Сонымен қатар «Тұтынушылардың құқықтарын қорғау туралы» ҚР Заңының 6-бабы 7-тармағына сәйкес «тұтынушылардың белгісіз тобының құқықтарын қорғау мәселелері бойынша сотқа жүгіну (10 адамнан астам)» критерийі аясында үш резонанстық іс қаралды. Нәтижесінде 44 тұтынушының 1,8 млн теңге көлеміндегі құқығы қорғалды», – деді спикер баспасөз конференциясында.

Еске салайық, 2026 жылдың алғашқы үш айында Тұтынушылардың құқықтарын қорғау комитеті қазақстандықтардан түскен 22 мыңнан астам өтінішті қараған болатын. Оның ішінде 7,3 мың өтініш бойынша тұтынушылардың талаптары қанағаттандырылып, 7,2 мың азаматқа құқықтық көмек пен түсіндіру жұмыстары жүргізілген.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз