Алатау қаласында арнайы құқықтық режим енгізу ұсынылды
Қала жаңа экономикалық және технологиялық шешімдерді сынақтан өткізетін алаң ретінде қарастырылуда
Қазақстанда Alatau City үшін бөлек құқықтық режим қалыптастыру тұжырымдамасы талқыланып жатыр. Бұл модель бизнестің мемлекеттік органдармен өзара іс-қимылын жеңілдетіп, басқаруды икемдірек етуге бағытталған, деп хабарлайды Kapital.kz іскерлік ақпарат орталығы.
Бұл туралы Қанат Бозымбаев баспасөз мәслихатында мәлімдеді.
Оның айтуынша, әлемдік тәжірибе арнайы экономикалық аймақтар тек нақты өкілеттіктерді орталықсыздандырғанда және әкімшілік кедергілер азайғанда ғана тиімді нәтиже береді.
Вице-премьер мысал ретінде Қытайдың Шэньчжэнь және Хайнань өңірлерін келтірді. Онда жергілікті әкімдіктерге салық және инвестициялық саясат бойынша кең өкілеттіктер берілген.
«Шэньчжэнь мен Хайнань тәжірибесі көрсеткендей, бұл қалаларда орталық үкімет жергілікті әкімдіктерге кең құзырет берген. Олар салық шешімдерін қабылдап, алымдарды реттеп, қолдау шараларын басқара алады. Соның нәтижесінде шешімдер жедел қабылданады», – деді Қанат Бозымбаев.
Оның айтуынша, Хайнань бүгінде ірі сауда-инвестициялық хаб ретінде дамып келеді.
Алатау үшін негізгі бағыттардың бірі – инвесторларға арналған арнайы салықтық режимдер мен инновация саласындағы қолдау тетіктерін енгізу. Сондай-ақ қалалық мобильділіктің жаңа түрлерін, соның ішінде 3000 метрге дейінгі әуе кеңістігін пайдалануды реттеу қарастырылып отыр.
«Біз аэротаксидің алғашқы демонстрациялық ұшуларын өткіздік. Дубай тәжірибесі бойынша барлық мемлекеттік қызметтерді «бір терезе» қағидатымен реттеу жоспарлануда», – деді вице-премьер.
Жаңа модельде бизнес-лицензия мемлекет пен инвестор арасындағы нақты шарттары бар келісім түрінде қарастырылады.
Үкімет Алатаудың даму стратегиясын ұзақмерзімді мастер-жоспармен бекітуді көздеп отыр. Бұл жоспар тұрақтылықты қамтамасыз етіп, жиі өзгерістерге жол бермеуі тиіс.
Қанат Бозымбаев атап өткендей, қала дамуы негізінен жеке инвестицияларға сүйенеді, ал мемлекет базалық инфрақұрылыммен айналысады.
«Егер бұл тетіктер тиімді болса, оларды кейін басқа өңірлерге де кеңейтуге болады», – деді ол.
Айта кетейік, биыл президент Қасым-Жомарт Тоқаев Алатау қаласының арнайы құқықтық режимі туралы Конституциялық заңға қол қойған болатын.
2028 жылға дейін қалада 365,1 млрд теңгеге инфрақұрылымдық жобалар іске асырылмақ. Инвесторлар тарапынан 44 жоба, жалпы 1,8 трлн теңге көлемінде ұсыныс қалыптасқан.
Сонымен қатар 2025 жылы алғашқы аэротакси сынақтан өткізілді, ал әуе көлігі қызметін 2029 жылы іске қосу жоспарланған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
