Қазақстан бюджетінің тапшылығы 2025 жылы 4,1 трлн теңгеге жетті
Мәжілісте республикалық бюджеттің орындалуы туралы есеп қаралып жатыр
Мәжілісте 2025 жылғы республикалық бюджеттің орындалуы жөніндегі Үкімет пен Жоғары аудиторлық палатаның есептері қаралуы басталды. Отырыста айтылған негізгі көрсеткіштердің бірі – бюджет тапшылығы. Ол 4,1 трлн теңгені құрап, елдің жалпы ішкі өнімінің 2,5%-ына тең болды, деп хабарлайды Kapital.kz іскерлік ақпарат орталығы.
Депутат Татьяна Савельева өткен жылы Қазақстан экономикасы нақты мәнде 6,5%-ға өскенін атап өтті. Экономикалық өсімге негізгі үлесті көлік саласы, құрылыс секторы, тау-кен өнеркәсібі және сауда саласы қосқан.
«Берілген есептерге сәйкес, 2025 жылы Қазақстан экономикасы нақты мәнде 6,5%-ға өсті. Негізгі драйверлер – көлік қызметтері, құрылыс, тау-кен өндіру өнеркәсібі және сауда», – деді депутат.
Оның айтуынша, республикалық бюджеттің кіріс бөлігі жоспардың 98,6%-ы деңгейінде орындалған, ал шығыстар 99,1%-ға жеткен. Нәтижесінде жалпы тапшылық 4,1 трлн теңгені құрады.
Парламентарий сондай-ақ биыл алғаш рет жаңа Бюджет кодексіне сәйкес кеңейтілген форматтағы бюджеттік есеп пилоттық режимде ұсынылғанын атап өтті.
«Қосымша ретінде мемлекеттік инвестициялық жобалар, бюджеттен тыс қорлар, мемлекеттік сектордағы қарыздар, шоғырландырылған бюджет және басқа да талдамалық материалдар ұсынылды. Бұл депутаттарға мемлекет бюджеті мен активтері туралы толыққанды көрініс алуға мүмкіндік береді», – деді ол.
Бұған дейін 2025 жылы шоғырландырылған бюджетке жер қойнауын пайдаланушылардан 12 трлн теңге салық түскені хабарланған. Сондай-ақ бюджет тапшылығын қаржыландыру және қарыздарды өтеу үшін 8,7 трлн теңге көлемінде рекордтық қаражат тартылған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
