Оман ханшайымының компаниясы Қазақстанда асшаян өсіруге $50 млн инвестиция салады
Жоба аясында жылына 5300 тонна өнім өндіру көзделіп отыр
Big Blue Farms халықаралық компаниясы Қазақстанда асшаян өндірісіне 50 миллион доллар инвестициялайды, деп хабарлайды Kapital.kz іскерлік ақпарат орталығы Балық шаруашылығы комитетінің баспасөз қызметіне сілтеме жасап.
Балық шаруашылығы комитетінде Қазақстанда заманауи асшаян өсіру кешенін салу жөніндегі инвестициялық жоба туралы меморандумға қол қою рәсімі өтті. Жобаның инвесторы Big Blue Farms халықаралық компаниясы. Ресми кездесуге инвестор жағынан директорлар кеңесінің мүшесі Марсиа Фавал және ҚР АШМ Балық шаруашылығы комитетінің төрағасы Серік Сермағамбетов қатысыты.
«Біз Қазақстан Президентінің азық-түлік қауіпсіздігін нығайтуға, импортты алмастыруға, шикізаттық емес экспортты кеңейтуге, инновациялар мен тұрақты дамуға негізделген жаңа экономиканы қалыптастыруға бағытталған стратегиялық жобаны мақтанышпен қолдаймыз. Бұл жоба ел үшін жаңа агроөнеркәсіптік әлеуетті құруда, халықаралық сараптама мен инвестицияларды тартуда, Қазақстанның жоғары технологиялық және тұрақты азық-түлік өндірісінің өңірлік хабы ретіндегі рөлін нығайтуда маңызды қадам болады». — деп жобаға Оман мемлекетінің Мәртебелі ханшайымы, Big Blue Farms негізін қалаушы Сайида Сария Әл Саид өз қолдауын білдірді.
Жобаның жергілікті серіктесі әрі мердігері - қазақстандық Artex Machinery компаниясы. Жобаға салынатын инвестицияның жалпы көлемі шамамен 50 миллион долларды құрайды. Қазір өндіріс кешенін іске асыру өңірі таңдалып жатыр. Жоба аясында жылына 5300 тонна асшаяндарды өндіру көзделіп отыр.
Сондай-ақ, өндіріс ішкі нарықты қамтамасыз етіп қана қоймай, өңірдің экспорттық әлеуетін дамытуды көздейді. Жоба толық өндірістік қуатқа шыққанда 300-ден астам жаңа жұмыс орны ашылады деп жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
