Павлодарда құны 11 млрд теңге болатын жаңа мыс зауыты ашылды
Өңірдегі алғашқы гидрометаллургиялық зауытта 300-ден астам жұмыс орны ашылады деп күтіледі
Павлодар мен Қарағанды облыстарының шекарасында орналасқан Әлкей Марғұлан атындағы ауылдың маңында отандық металлургия саласы үшін аса маңызды гидрометаллургиялық зауыты ашылды, деп хабарлайды Kapital.kz іскерлік ақпарат орталығы Павлодар облысы әкімдігіне сілтеме жасап. Өңірдегі ең жоғары технологиялы индустриялық жобаның ашылуына Павлодар облысының әкімі Асайын Байханов қатысты.
Өңір басшысы жаңа зауыттың ашылуы бүгінде аймақта жүзеге асырылып жатқан ауқымды өзгерістердің символына айналғанын атап өтті. Екібастұз моноқалалар тізімінен шығып, дамудың жаңа кезеңіне сенімді түрде қадам басқанын айтты.
«Fonet Er-Tai Mining» гидрометаллургиялық зауытының іске қосылуы Президент қойған стратегиялық міндеттерге толық сәйкес келеді. Құны 11 млрд теңгеден асатын жоба өңірдің өңдеу өнеркәсібін дамытудағы қуатты қозғаушы күшке айналады. Кәсіпорын жергілікті мыс кенін өңдеп, жылына 5 мың тонна жоғары сапалы катодты мыс өндіреді. Бұл - энергетика, инфрақұрылым және жоғары технологиялық салалар үшін стратегиялық маңызы бар металл. 300-ден астам жұмыс орны ашылып, жүздеген отбасының тұрақты жұмыспен қамтылуына және әл-ауқатының артуына мүмкіндік береді», - деді Асайын Байханов.
Салтанатты рәсім барысында LED-экраннан кәсіпорынның құрылысы мен іске қосылуы туралы баяндалған бейнеролик көрсетілді. Ауқымды жоба кезең-кезеңімен жүзеге асырылды.
Кәсіпорында заманауи технологияларға ерекше көңіл бөлінген. Қолданылып отырған гидрометаллургиялық әдіс металды өндіру тиімділігін едәуір арттырып, өндірістің экологиялық қауіпсіз әрі технологиялық тұрғыдан озық болуына мүмкіндік береді.
Асайын Байханов инвесторларға өңірге сенім білдіріп, жобаны жауапкершілікпен жүзеге асырғандары үшін алғыс айтып, кәсіпорын ұжымына тұрақты жұмыс тіледі.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
