Бизнес жаңа Салық кодексін қалай бағалайды
PwC CEO Survey респонденттері операциялық шығындардың өсуін және өтпелі кезеңнің белгісіздігін атап өтуде
Қазақстанның PwC CEO Survey алғашқы басшылары арасында жүргізілген 14-ші сауалнамасының қатысушылары жаңа Салық кодексін бейімделуді және компанияларды мұқият басқаруды талап ететін маңызды өзгеріс ретінде бағалайды. Респонденттер қазіргі кезеңді белгісіздік кезеңі ретінде сипаттайды, деп хабарлайды Kapital.kz іскерлік ақпарат орталығының тілшісі есеп мәліметтеріне сілтеме жасап.
«Тұрақты құқық қолдану тәжірибесін және жаңа нормаларды түсіндірудің бірыңғай тәсілдерін қалыптастыру әлі де жалғасуда, бұл бизнестің салықтық тәуекелдерге деген назарын күшейте түседі. Мұндай жағдайда компаниялар стратегиялық және инвестициялық шешімдерде жоғары сақтық танытуда. Басқарушы командалардың назары операциялық тұрақтылықты сақтауға, ішкі бақылауды күшейтуге және қабылданатын шешімдердің салдарын мұқият бағалауға ауысуда. Сондай-ақ бизнес жаңа салық кодексі бейімделу және басқарушылық белсенділікті арттыру кезеңін бастайтынын атап өтеді», - деп көрсетеді зерттеу авторлары.
Бизнес салықтық және есепке алу процестерін қайта құруға байланысты шығындардың өсуін және процедуралардың күрделенуін байқап отыр.
«Респонденттердің бағалауынша, салық реформасының ұзақ мерзімді тиімділігі оған салынған параметрлерге емес, оның іс жүзінде іске асырылу сапасына тікелей байланысты болады. Респонденттер жаңа салық кодексінің ережелері шағын және орта бизнеске қалай әсер ететініне жиі алаңдаушылық білдіреді. Сондай-ақ ШОБ, ірі компанияларға қарағанда, қаржылық, кадрлық және аналитикалық ресурстары шектеулі екендігі, бұл оны реттеу мен әкімшілендірудің күрделенуіне анағұрлым сезімтал ететіні айтылады. Мұндай жағдайда ШОБ-қа түсетін жүктеменің пропорционалды емес өсу қаупі бар, бұл кәсіпкерлік белсенділік пен инвестицияларды тежеуі мүмкін», - делінген PwC CEO Survey сауалнамасында.
CEO-лар бірнеше жылдық көкжиекте жоспарлау мүмкіндігі қысқа мерзімді пайдадан немесе нүктелі өзгерістерден маңыздырақ екенін баса айтады. Респонденттер сонымен қатар сенімді қалыптастыру үшін салық заңнамасының тұрақтылығы жекелеген мөлшерлемелердің деңгейінен маңыздырақ екенін атап өтеді. Жиі түзетулер мен тәсілдердің өзгеруі, тіпті формальды түрде қолайлы параметрлер болған күннің өзінде, тәуекелдерді қабылдауды арттырып, инвестициялық белсенділікті тежейді. PwC CEO Survey-де бизнес салықтық әкімшілендірудің тұрақтылығын позитивті сценарийдің басты шарты деп санайтыны, ал салық органдарының түсінікті процедуралары мен сервистік тәсілі мемлекет пен кәсіпкерлер арасындағы сенімнің негізі болатыны көрсетілген.
Жаңа салық кодексі тақырыбында және оның бизнеске әсері туралы ірі компаниялардың басшылары мен иелері пікір білдірді, олардың арасында Aitas Group негізін қалаушы Серік Толықпаев, «Ситибанк Қазақстан» басқарма төрайымы Сәуле Жақаева, Орталық Азия мен Кавказдағы Schneider Electric бас директоры Эдгар Бу-Шахин, «ЛОТТЕ Рахат» басқарма төрағасы Ахмед Ахраров, Cerebra негізін қалаушы Досжан Жүсіпов, STADA өкілдігінің директоры Қуаныш Оспанов және басқалар бар. Респонденттердің жаңа Салық кодексі туралы дәйексөздерін сілтеме арқылы көруге болады.
Еске сала кетейік, 2026 жылғы 20 қаңтарда V Ұлттық құрылтай отырысында президент Қасым-Жомарт Тоқаев жаңа Салық кодексі бойынша сындарлы ұсыныстарды зерделеуді және оған түзетулер енгізуді тапырды. Содан кейін премьер-министр Олжас Бектенов үкіметке халық пен бизнестің жаңа Салық кодексі бойынша ұсыныстарын жинақтап, талдауды тапсырды. Жалпы алғанда, Жобалық кеңсенің отырыстарында СК нормаларын имплементациялауға байланысты 60-тан астам мәселе қаралды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
