2026 жылы шағын бизнеске өсімпұл есептелмейді: Үкімет жаңа жеңілдік енгізді
Қазақстанда микро және шағын кәсіпкерлер үшін салықтық әкімшілендіру жеңілдетіліп, әкімшілік жүктеме азаяды
Қазақстан Үкіметі 2026 жылы микро және шағын кәсіпкерлік субъектілері үшін салықтық әкімшілендіруді жеңілдету шараларын жалғастыру туралы шешім қабылдады, деп хабарлайды Kapital.kz іскерлік ақпарат орталығы Мемлекеттік кірістер комиетіне сілтеме жасап.
Қабылданған шаралар макроэкономикалық тұрақтылықты қамтамасыз етуге, бизнеске түсетін әкімшілік жүктемені төмендетуге және кәсіпкерлік қызмет үшін қолайлы жағдай жасауға бағытталған.
Үкіметтің шешіміне сәйкес, 2026 жылғы 1 қаңтар мен 31 желтоқсан аралығында микро және шағын бизнес субъектілеріне қатысты салық заңнамасында белгіленген мерзімде төленбеген салықтар мен бюджетке төленетін төлемдер бойынша өсімпұл есептелмейді. Бұл талап аванстық және ағымдағы төлемдерге де қатысты болады.
Алайда жеңілдік барлық салық түріне қолданылмайды. Атап айтқанда, төлем көзінен ұсталатын салықтар, импортталатын акцизделетін тауарларға салынатын акциздер, импорттық қосылған құн салығы және әлеуметтік төлемдер бұл шарадан тыс қалады.
Сонымен қатар 2026 жылғы 31 желтоқсаннан кейін кей жағдайларда өсімпұл қайта есептелуі мүмкін. Бұл қосымша салық есептілігі тапсырылғанда немесе мемлекеттік кірістер органдары салықтық әкімшілендіру нәтижесінде салықтар мен төлемдер сомасын қайта есептеген жағдайда жүзеге асырылады.
Комитет қабылданған шешім салықтық әкімшілендіру жүйесін жетілдіруге, кәсіпкерлерге түсетін жүктемені азайтуға және мемлекет пен бизнес арасындағы сенім мен ашықтыққа негізделген әріптестікті нығайтуға бағытталғанын атап өтті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
