East Hope Group Қостанайда жаңа электролиз зауыты мен ЖЭС салады
Өндірістік кешеннің жалпы құны 10 млрд доллардан астам сомаға бағалануда
Премьер-Министрдің бірінші орынбасары Нұрлыбек Нәлібаев East Hope Group стратегиялық инвестициялар жөніндегі бас директоры Чен Леймен кездесу өткізді, деп хабарлайды Primeminister.kz.
Кездесу барысында Қазақстанда алюминий саласында өндірістік және энергетикалық нысандар құруды көздейтін ірі инвестициялық жобаны іске асыру мәселелері талқыланды.
Атап айтқанда, компания Қостанай облысында жалпы құны 10 млрд доллардан асатын өндірістік кешенді іске қосуды жоспарлап отыр. Жоба бокситтерді қайта өңдейтін тау-кен байыту комбинатын, алюминий шығаратын электролиз зауытын және жел электр станциясын салуды қамтиды.
Тараптар бастаманы пысықтаудың қазіргі жағдайын, шикізат базасымен қамтамасыз ету, энергетикалық инфрақұрылымды дамыту және мемлекеттік органдармен одан әрі өзара іс-қимыл жасау мәселелерін қарастырды.
Кездесу қорытындысы бойынша Нұрлыбек Нәлібаев үкіметтің аталған жобаны іске асыру бойынша бірлескен жұмысты жалғастыру ниетін растады.
Анықтама: East Hope Group электролиздік алюминий, глинозем және поликремний өндіретін әлемдегі ең ірі компаниялардың қатарына кіреді. 2010 жылдан бастап компания Қытайда электролиздік алюминий, өнеркәсіптік кремний мен поликремний өндірісін, сондай-ақ қуаттылығы 4,2 ГВт болатын автономды электр станциясын қамтитын интеграцияланған индустриялық паркті құруға шамамен 10 млрд доллар инвестиция салды. Жоба аясында 10,7 мың тікелей және 30 мыңнан астам жанама жұмыс орны құрылды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
