Отандық балмұздақ нарығында тарихи рекорд: Экспорт импорттан асып түсті
Қазақстандық балмұздаққа сұраныс артып, былтыр экспорттық түсім 49 млн доллардан асты
2025 жылдың қорытындысы бойынша Қазақстан алғаш рет балмұздақ өндірісі бойынша рекордтық көрсеткіштерге қол жеткізіп, өнімнің нетто-экспорттаушысы атанды, деп хабарлайды Kapital.kz іскерлік ақпарат орталығы Ауыл шаруашылығы министрлігіне сілтеме жасап.
Ведомсвто мәліметінше, былтыр балмұздақ өндірісінің көлемі 63,2 мың тоннаға жетіп, 2024 жылмен салыстырғанда 22%-ға артқан.
«Бұл 2000 жылдардың басынан бергі алғашқы жоғарғы көрсеткіш. Ерекше атап өтерлігі Қазақстан тарихта алғаш рет балмұздақтың нетто-экспорттаушысы мәртебесіне ие болды. Жыл қорытындысы бойынша экспорт көлемі 36,8%-ға артып, 14,2 мың тоннаны құрады және импорт көрсеткішінен асып түсті. Қазақстандық балмұздақтар негізінен Ресей, Қырғызстан және Өзбекстан елдеріне экспортталады», деді министрлікте.
Сонымен қатар ведомство балмұздақ импорты көлемі төмендеп жатқанын атап өтті. Мәселен, 2025 жылы балмұздақ импорты 5,1%-ға қысқарып, 12,2 мың тоннаға дейін азайды. Бұл отандық өндірушілердің сыртқы нарықта бәсекеге қабілеттілігі артып, ішкі нарықта позициясының нығайып келе жатқанын көрсетеді, деп атап өтті министрлікте.
Қарқынды өсім биылғы жылы да сақталып отыр. Қаңтар–наурыз айларының қорытындысы бойынша балмұздақ өндірісі бірден 58,6%-ға өсіп, 14 566 тоннаға жетті. Бұл өндірістің жыл санап нығайып келе жатқанын, ішкі және сыртқы нарықтарда өнімге деген сұраныстың жоғары екенін көрсетеді.
Бүгінде Қазақстанда саланың негізгі қозғаушысы «Шин-Лайн» компаниясы деуге болады, ол Қазақстандағы балмұздақ экспортының 95%-ына дейін қамтиды. Бүгінде компания ТМД елдері арасындағы балмұздақ өндірушілер арасында 4-орында тұр. Былтырғы жылдың қорытындысы бойынша компанияның экспортты 14,2 мың тоннаға жетті, ал экспорттық түсім 49 млн доллардан артық. Негізінен Қытай, Ресей, Беларусь, Моңғолия, Кавказ елдері және Орталық Азия мемлекеттерін қоса алғанда, оннан астам елді қамтиды.
Бұған қоса, өсімге өндірістік инфрақұрылымға салынған ауқымды инвестициялар мен жеткізілетін өнім құнының өсуі де ықпал етті. Мәселен, былтыр қазақстандық балмұздақтың орташа экспорттық бағасы 1 кг үшін 3,47 долларға жетіп, отандық өнімнің қосылған құны мен сапасының артқанын көрсетті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
