Қазақстан Моңғолияға вагон экспортын бастайды
Тараптар $10 млн келісім жасады, алғашқы 100 вагон бір айда жеткізіледі
Қазақстан Моңғолияға отандық өндірістегі теміржол вагондарын жеткізуді бастайды. Моңғолия делегациясының Қазақстанға ресми сапары аясында алғашқы экспорттық келісімшартқа қол қойылды, деп хабарлайды Kapital.kz іскерлік ақпарат орталығы Өнеркәсіп комитетінің баспасөз қызметіне сілтеме жасап.
Келісімге сәйкес, жеткізуші — Атырау вагон жасау зауыты (АВЖЗ). Құжат талаптарына сай, люкті жартылай вагондардың алғашқы 100 бірлігі бір ай ішінде моңғолиялық Mongolian Ore Bal LLC компаниясына жөнелтіледі. Келісімнің жалпы құны шамамен 10 млн АҚШ долларын құрайды.
АВЖЗ — TEXOL компаниялар тобына кіретін, толық өндірістік циклді қамтитын ірі кәсіпорын. Зауыт 1520 мм табанды теміржол жүйесіне және еуропалық нарық талаптарына бейімделген вагондар шығарады. Өнім желісінде жүк көтергіштігі жоғары жартылай вагондар, контейнерлік платформалар, мұнай өнімдеріне арналған 94 м³ цистерналар және сұйытылған көмірсутек газына арналған 163,1 м³ цистерна вагондары бар.
Қазіргі уақытта кәсіпорынның бірінші кезеңі толық іске қосылған. Жақын арада салалық ғылыми-зерттеу және сынақ орталығын ашу жоспарланып отыр. Жобалық қуаты жылына 8 мың вагонға дейін жетеді. Атыраудағы индустриялық кластерге салынған инвестиция көлемі шамамен 400 млн долларды құрайды.
Экспорттық келісім Моңғолиядағы тау-кен жобаларымен де байланысты. Mongolian Ore Bal LLC құрамында шамамен 18 млн тонна темір рудасы бар кен орнын игеру лицензиясына ие. Қазіргі өндіріс көлеміне сәйкес, компанияға теміржол арқылы ай сайын шамамен 20 пойыз, яғни 1000 вагон қажет.
Айта кету керек, моңғолиялық компания Қазақстанмен сауда байланысын бұрыннан дамытып келеді. Елден бидай, рапс, зығыр сияқты ауыл шаруашылығы өнімдері мен өнеркәсіптік техника импортталады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
