Қатонқарағайда халықаралық 5 жұлдызды қонақүйлер мен музейлер салынады

Қатонқарағай елдегі ең экологиялық таза қалаға айналады. Бұл жоспар Катонқарағайды дамытудың стратегиялық құжатында көзделген, деп хабарлайды Kapital.kz іскерлік ақпарат орталығы.

Шығыс Қазақстан облысы әкімдігінде Қатонқарағай ауданын дамыту мәселесі талқыланды. Онда аудан әкімдігі мен Aitas холдингі бірлесе әзірлеген Қатонқарағайды дамытудың стратегиялық құжаты таныстырылды.

Aitas Meken foundation корпоративтік қорының атқарушы директоры Фатима Герфанованың сөзінше, соңғы 7 жылда Катонқарағайда 100-ден астам жоба іске асқан. Оның 75-і туризм саласына қатысты.

«Аудан әкімдігімен бірлескен жұмыстың арқасында қызмет көрсетілген туристер саны 5 есе, бөлшек сауда көлемі 2 есе, мектептердегі білім сапасы 20%-ке өсті. Енді Қатонқарағайды дамытудың 2030 жылға дейінгі жоспары әзірленіп отыр», - деді ол.

Стратегиялық құжат саналы туризм кластерін құрып, ауданның өз экономикасының 50%-ін қамтамасыз ете алуына қол жеткізуді көздейді. Соған сәйкес, алдағы бес жылда ауданда халықаралық деңгейдегі 2 қонақүй, 2 музей, 3 көпфункционалды сауда және туристік кешен, ауыл шаруашылығы өнімдері сатылатын 2 базар салынады деп жоспарланған.

Сонымен қатар Қатонқарағай мен Өрел негізгі тірек ауылдар болады деп көзделіп отыр. Олар базалық инфрақұрылыммен толықтай қамтылып, 3 жаңа мектеп, 2 балабақша бой көтереді.

Холдинг өкілдері басқа ауылдардың да назардан тыс қалмайтынын айтып отыр. Экологияға да баса мән беріліп, халықаралық Green Destination сертификатын алу жоспарланып отыр. Осылайша, Қатонқарағай ел бойынша ауаға мүлде зиянды шығарындылар тарамайтын алғашқы ауданға айналдыру көзделген.

Айта кетейік, холдинг Қатонқарағайдан бөлек, Ұлан және Шемонаиха аудандарында жұмыс істеуді көздейді, одан басқа бизнес өкілдері Риддер қаласы, Үлкен Нарын, Марқакөл және Күршім аудандарына қаражат салады деп жоспарланып отыр.