Қазақстанда 2026 жылы 210 млн-нан астам көшет отырғызу жоспарлануда

Премьер-министр Олжас Бектенов «Таза Қазақстан» бастамасын іске асыру барысын мониторингтеу орталығының отырысын өткізді. Онда көгалдандыру, орман алқаптарын құру және өңірлерде экологиялық жобаларды жүзеге асыру мәселелері қаралды, деп хабарлайды primeminister.kz.

Экология және табиғи ресурстар министрлігінің мәліметінше, 2021-2025 жылдар аралығында елде шамамен 1,6 млрд ағаш отырғызылған. Ал 2026 жылы 210 млн-нан астам көшет егу жоспарланып отыр.

Көшетпен қамтамасыз ету үшін арнайы тәлімбақтар құрылуда. Қазіргі таңда жалпы ауданы 2,7 мың гектарды құрайтын 243 орман тәлімбағында шамамен 157 млн көшет өсірілуде. Биыл өндірістік қуаты жылына 6 млн көшет өсіруге қауқарлы тағы 6 жобаны іске асыру көзделген.

Арал өңірінің экожүйесін қалпына келтіру аясында 2021-2025 жылдары 1 млн гектардан астам аумақта орман-мелиорациялық жұмыстар жүргізілді. Қазіргі уақытта бұл жұмыстар 165 мың гектар жерде жалғасуда. Сонымен қатар, өңірде Қазақ орман шаруашылығы және агроорман мелиорациясы ғылыми-зерттеу институтының филиалы құрылып, Арал теңізінің құрғаған табанында тәлімбақ салынуда. «Арал Орманы» мемлекеттік табиғи резерватын құру жұмыстары да аяқталуға жақын.

Мемлекеттік органдар мен жергілікті атқарушы құрылымдарға тек жоспарды орындау ғана емес, отырғызылған көшеттердің жерсінуін қамтамасыз ету міндеті жүктелді. Осыған байланысты экология министрлігі мен әкімдіктерге көшеттердің өміршеңдігін тұрақты бақылауда ұстау тапсырылды.

Сондай-ақ көгалдандыру жұмыстарына заманауи технологияларды енгізу көзделуде. Атап айтқанда, жерді қашықтықтан зондтау, дрондар мен жасанды интеллект элементтерін пайдалану ұсынылды.

Бұдан бөлек, орман тәлімбақтарының желісін дамытуға ерекше назар аударылып отыр. Бірқатар өңірде жаңа тәлімбақтардың құрылысын жеделдету және жабық тамыр жүйесі бар сапалы көшеттерді өсіру жүйесін қалыптастыру жоспарланған.

Қалдықтарды басқару бағытында да жұмыстар жалғасуда. Қазіргі уақытта 185 млрд теңге көлемінде жеңілдетілген қаржыландыру қарастырылып, жалпы сомасы 90 млрд теңгеден асатын 26 жоба жүзеге асырылуда. Сонымен қатар, жер қойнауын пайдаланушылармен бірлесіп карьер аумақтарының кемінде 40%-ын көгалдандыру міндеті қойылды.

23 наурызда «Мөлдір Бұлақ» республикалық акциясы басталады. Оның аясында бұлақ көздерін тазарту, жағалау аумақтарын ретке келтіру және 700-ден астам су нысанын түгендеу жоспарланған.

Экологиялық бастамаларды іске асыру жұмыстары биылғы жылға арналған жаңа акциялар кестесіне сәйкес жалғасады.