Алатау қаласында жер телімдері мен салық жеңілдіктері қалай беріледі?

Премьер-министрдің орынбасары Қанат Бозымбаев Парламент Палаталарының бірлескен отырысында Алатау қаласының арнаулы мәртебесі туралы Конституциялық заң жобасын таныстырды, деп хабарлайды Kapital.kz іскерлік ақпарат орталығы.

Оның айтуынша, құжатты әзірлеу барысында әлемдік тәжірибе жан-жақты зерттелген. Атап айтқанда, Қытайдағы Шэньчжэнь мен Хайнань, Кореядағы Седжон және Сонгдо, сондай-ақ Сингапур, Дубай және Доха қалаларының даму модельдері негізге алынған. Алайда соңғы онжылдықта әлемде мыңнан астам арнайы аймақ құрылғанымен, олардың 60%-ы сәтсіз аяқталған. Сәтсіздіктің негізгі себептері – бюрократия, тәуелсіз соттың жоқтығы және салықтық тұрақсыздық. Алатау жобасында бұл қателіктер ескерілмек.

«Осыларды ескере отырып, Алатау қаласында да әкімшілік салық режимдерін бекіту, жеңілдіктерді және инвестициялық қолдаудағы дербестікті енгізуді ұсынып отырмыз. Бұл әсіресе Қазақстанда әлі толық енгізілмеген жаңа салалар үшін маңызды», – деді Қанат Бозымбаев.

Алатау қалай басқарылады?

Қалада Alatau City Authority атты жаңа мемлекеттік орган құрылады. Оның стратегиялық бағытын Премьер-министр басқаратын Кеңес айқындаса, күнделікті әкімшілік жұмысқа Бас атқарушы директор (CEO) жауапты болады. Ал дәстүрлі әкімдік пен мәслихат тек әлеуметтік және коммуналдық мәселелермен айналысады.

Қала дамуының 7 негізгі бағыты:

1. Дербес басқару: Стратегиялық шешімдерді Премьер-министр жанындағы Кеңес қабылдайды.

2. Инвестициялық кепілдік: Инвесторлар өз құқықтарын Астана қаржы орталығының (АХҚО) сотында немесе халықаралық арбитражда қорғай алады.

3. Тұрақты салықтар: Жеңілдіктер тек экспортқа бағытталған және инновациялық жобаларға беріледі. Барлық жеңілдіктер мен инвесторлардың міндеттемелері ашық түрде жарияланатын болады.

4. Бюджеттік тәуелсіздік: Alatau City Authority республикалық бюджеттік бағдарламалардың дербес әкімшісі болады.Қала өзін-өзі қамтамасыз еткенше, оның қаражаты басқа бюджеттерге алынбайды.

5. Ұзақ мерзімді жоспар: Стратегиялық құжаттар 30 жылға қабылданады және оларға 5-10 жыл бойы өзгеріс енгізуге тыйым салынады.

6. Жер қатынастары: Жер қатынастары арнайы режим арқылы реттеледі. Қаланың жер қоры қалыптастырылады. Жер телімдері нақты инвестициялық міндеттемелер (бизнес-лицензия) негізінде беріледі.

7. Цифрлық экожүйе: Барлық қызметтер цифрлық форматта болады, тіпті криптобиржа мен токенизация мүмкіндіктері қарастырылған.

Қазіргі күні қалада құны 1,8 трлн теңгені құрайтын 44 инвестициялық жоба пулы жасақталған. Бұл жобалар шамамен 30 мың жаңа жұмыс орнын ашуға мүмкіндік береді. Инвесторлар қатарында Mars, PepsiCo, Hyundai Green Food, Envision Energy, Khan Tengri Biopharma сияқты ірі халықаралық компаниялар бар.

Жоспарға сәйкес, 2030 жылға дейін қала инфрақұрылымы кезең-кезеңімен дамытылады. Ал 2050 жылға қарай Алатаудың өңірлік жалпы өнімі 50 млрд долларға дейін жетеді деп күтіліп отыр.