Ақтау теңіз порты АЭА аумағы 10 мың гектардан асты
Үкімет жаңа индикаторларды бекітті
Қазақстан Үкіметінің қаулысымен «Ақтау теңіз порты» арнайы экономикалық аймағының (АЭА) аумағын кеңейтілді, деп хабарлайды Kapital.kz іскерлік ақпарат орталығы.
Құжатқа сәйкес, Маңғыстау облысындағы көлік-логистикалық әлеуетті дамыту мақсатында АЭА құрамына Мұнайлы ауданындағы өнеркәсіптік аймақтан 187 гектар және «Ерсай Каспиан Контрактор» ЖШС-нен 382,6 гектар жер қосылды. Осылайша, аймақтың жалпы аумағы 10 384 гектарға жетті.
Қазіргі таңда «Ақтау теңіз порты» АЭА Ақтау және Жаңаөзен қалаларының, сондай-ақ Мұнайлы, Қарақия және Түпқараған аудандарының аумағын қамтиды.
Сонымен қатар, арнайы экономикалық аймақтың жаңартылған аумақтық жоспары бекітілді. Оның ішінде: порттық аймақ – 1038,9 гектар индустриялық аймақ – 7615,1 гектар және логистикалық аймақ – 1730 гектар.
Үкімет 2052 жылға дейінгі жаңа мақсатты индикаторларды да айқындады. Атап айтқанда, инвестиция көлемі 1,7 трлн теңгеге дейін ұлғайтылады. Өндірілетін тауарлар мен қызметтердің жалпы көлемі 1,7 трлн теңгеден асады деп жоспарланып отыр.
Сондай-ақ, АЭА-ға қатысушы компаниялар саны 188-ге дейін өсіп, 9,9 мыңға жуық жаңа жұмыс орны ашылады деп күтіліп отыр, ал өндірістегі қазақстандық қамту үлесі 83% деңгейінде сақталады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
