2026 жылы Қазақстанның бес өңірінде жерасты суларын іздеу жұмыстары жүргізіледі

Қазақстанның бес өңірінде жаңа жерасты су көздерін анықтау бойынша кешенді іздестіру-барлау жұмыстарын 2027 жылға дейін жүргізу жоспарлануда, деп хабарлайды Kapital.kz іскерлік ақпарат орталығы Су ресурстары және ирригация министрлігінің баспасөз қызметіне сілтеме жасап.

Ведомство мәліметінше, зерттеу жұмыстары Ақмола, Батыс Қазақстан, Қостанай облыстарында, сондай-ақ Жетісу және Ұлытау облыстарында жүргізіледі. Бұл жұмыстар жерасты суларының ресурс базасын кеңейтуге және елді мекендерді, ауыл шаруашылығын және экономиканың басқа да салаларын қосымша сумен қамтамасыз ету көздерін қалыптастыруға бағытталған.

Сонымен қатар, 2026 жылы жерасты су кен орындарын барлау бойынша 28 жаңа жобаны әзірлеу жоспарлануда. Оның ішінде: Жамбыл облысында 9 жоба, Ақмола облысында 3 жоба, БҚО және Түркістан облыстарында 4 жобадан, Маңғыстау және Атырау облыстарында 2 жобадан, ал ШҚО, Павлодар, Қызылорда және Ұлытау облыстарында. 1 жобадан көзделіп отыр.

Жалпы, Қазақстан аумағында ауыз су және техникалық сумен қамтамасыз етуге, суаруға және басқа да шаруашылық қажеттіліктерге арналған 4803 жерасты су кен орны барланған.

Мемлекеттік теңгерім мәліметтеріне сәйкес, жерасты суларының пайдалану қорлары тәулігіне 43,2 млн текше метрді құрайды, бұл ретте ресурстарды нақты пайдалану тәулігіне шамамен 1,5 млн текше метрді немесе жалпы көлемнің 3,6%-ын құрайды.

Барланған қорлардың құрылымында 21,2 млн текше метр/тәулік – шаруашылық-ауыз сумен қамтамасыз етуге, 2,4 млн текше метр/тәулік – өндірістік-техникалық қажеттіліктерге,19,6 млн текше метр/тәулік – суару мақсаттарына пайдаланылуы мүмкін.

«Су ресурстарының тапшылығы мен климаттық өзгерістер жағдайында жерасты суларының әлеуетін дамыту тұрақты су пайдалануды қамтамасыз етудің негізгі бағыттарының бірі ретінде қарастырылады. Жерасты су ресурстарының үлкен әлеуетіне қарамастан, олардың едәуір бөлігі жеткіліксіз зерттелген күйінде қалып отыр. Осыған байланысты министрлік жерасты су ресурстарын басқарудың заманауи жүйесін қалыптастыруға бағытталған Жерасты суларын кешенді пайдалану тұжырымдамасын әзірлеуге бастамашы болды. Бұл тұжырымдаманы іске асыру жерасты суларын игеру тиімділігін арттыруға, елді мекендер мен экономика салаларын ұтымды және тұрақты сумен қамтамасыз етуге мүмкіндік береді, сондай-ақ су қорын сақтау мен молайтуға ықпал етеді», – деді су ресурстары және ирригация вице-министрі Талғат Момышев.

Бұған дейін Қазақстанда шаруашылық-ауыз су мақсатындағы су қорлары қалай бағаланатыны хабарланған болатын. Елде 700-ден астам әлеуетті бұлақ көздері анықталды.