Қазақстан мен Италия Каспий маңындағы жаңа кен орындарын зерттеуді бастады

Маңғыстау облысында Eni компаниясымен бірлесіп қуаты 247 МВт болатын гибридті электр стансасы салынып жатыр. Сонымен қатар, тараптар «Каменковский» учаскесін игерудің практикалық кезеңіне өтті, деп хабарлайды Kapital.kz іскерлік ақпарат орталығы.

ҚР Энергетика министрі Ерлан Ақкенженов пен Италияның Елшісі Антонелло Де Риудың кездесуі барысында мұнай-газ химиясы мен «жасыл» энергетика саласындағы стратегиялық жобалардың барысы пысықталды.

2026 жылдың қаңтарынан бастап QazaqGaz және Eni компаниялары Каспий маңы бассейніндегі «Каменковский» учаскесінде геологиялық зерттеулердің белсенді фазасына кірісті. Бұл жоба елдің ресурстық базасын кеңейтудегі маңызды қадам болмақ. Бұдан бөлек «Оңтүстік Шу-Сарысу» және «Береке» учаскелері бойынша жұмыстар жоспарға сай жалғасып жатыр.

Энергетикалық трансформация аясында Жаңаөзен қаласында бірегей гибридті электр стансасының құрылысы жүріп жатыр. Жобаның басты ерекшелігі — күн, жел және газ энергиясын бір мезетте қолдануында.

Онда 2025 жылдың қыркүйегінде 80 мың күн панелі орнатылған станса іске қосылып, таза электр өндіре бастады. 2026 жылдың соңына дейін газ және жел қондырғылары да қолданысқа беріледі. Бұл нысан Маңғыстау облысындағы ірі өндірістік кәсіпорындардың энергетикалық тәуелсіздігін нығайтып, аймақтағы электр энергиясының тапшылығын жоюға мүмкіндік береді.

Италиялық инвестиция тек өндіру саласымен шектелмейді. «Полиэтилен» ірі жобасы аясында Maire Tecnimont консорциумы полимерлеу қондырғысының құрылысын бастап кетті. Ал Алматыдағы ЖЭО-3 стансасын газға көшіру үшін Ansaldo Energia компаниясының заманауи газ турбиналары жеткізілді.