Қазақстанда ақылы автожолдармен жүру ақысын төлеу тәртібі жеңілдетілді
Бұл туралы бұйрықты Көлік министрлігі бекітті
Ақылы автомобиль жолдарымен жүру ақысын төлеу тәртібін реттейтін ережелерге енгізілген өзгерістер туралы бұйрықты көлік министрлігі бекітті. Олар төлемді кешіктірген жағдайда талаптарды жұмсартуды көздейді, деп хабарлайды Kapital.kz іскерлік ақпарат орталығы ведомствоның баспасөз қызметіне сілтеме жасап.
Құжат ақылы жолдарды пайдаланушылар үшін неғұрлым икемді әрі қолайлы төлем тетігін қарастырады және төлемді уақытында жүргізбегені үшін жүргізушілерді әкімшілік жауапкершілікке тарту жағдайларын азайтуға бағытталған.
«Бұған дейінгі нормаға сәйкес, егер жүргізуші жеті күнтізбелік күн ішінде жол ақысын төлемесе, сегізінші күні материалдар Қазақстан Республикасының «Әкімшілік құқық бұзушылық туралы» кодексіне сәйкес қарау үшін көліктік бақылау органдарына жіберілетін. Енді неғұрлым жеңілдетілген тетік енгізіліп отыр. Егер жеке тұлға жол жүрген күннен бастап 30 күнтізбелік күн ішінде төлем жасамаса, материалдар 31-ші күні заңнамада белгіленген тәртіппен көліктік бақылау органдарына жолданады», – деп түсіндірді министрлікте.
Сонымен қатар алғаш рет жеке және заңды тұлғалар үшін бөлек тәртіп енгізілді. Егер заңды тұлға есепті айдан кейінгі айдың 20-сына дейін төлем жасамаса, материалдар келесі күні көліктік бақылау органдарына жіберіледі.
Ұсынылған өзгерістер жүргізушілерге республикалық маңызы бар ақылы жол учаскелері үшін төлем жасауға көбірек уақыт береді. Қол қойылған бұйрық алғашқы ресми жарияланған күнінен кейін 10 күнтізбелік күн өткен соң күшіне енеді.
Еске салайық, бұған дейін Қазақстанда 2026 жылы алты жол учаскесі ақылы болатыны хабарланған болатын. Үш ақылы учаскеде жасанды интеллект элементтері енгізілуде. Сондай-ақ 2026-2027 жылдары автожолдарды диагностикалаудың бірыңғай цифрлық базасы пайда болады.
2026 жылғы ақпанда ақылы жолдардың қай учаскелерінде төлем алу уақытша тоқтатылатыны туралы хабарланған еді. Бұған дейін жол жабынында ақауы бар ақылы трассаларда төлем уақытша алынбайтыны белгілі болған. 2 мың шақырым ақылы жолдың 350 шақырымында ақаулар анықталған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
