Қазақстанда ағашты таңбалау жобасы аяқталды
Жоба аясында ағаш бөренелері арнайы пластикалық пломбалармен белгіленді
Жоба 2025 жылдың тамызынан 2026 жылдың қаңтарына дейін жүзеге асырылып, ағаш дайындаудан бастап сатуға дейінгі барлық кезеңдерде цифрлық сәйкестендіру мен есепке алу тетіктері сыналды, деп хабарлайды Kapital.kz іскерлік ақпарат орталығы.
Тәжірибелік сынаққа «Семей Орманы» мемлекеттік орман табиғи резерваты және Абай облысы аумағында жұмыс істейтін кәсіпкерлік субъектілері қатысты.
Жоба аясында ағаш бөренелері бірегей нөмірі мен таңбалау коды бар арнайы пластикалық пломбалармен белгіленді. Пломбалар ағашқа арнайы құрал – балға-пломбиратор арқылы орнатылды. Оның конструкциясы қайта пайдалануға немесе қолдан жасауға мүмкіндік бермейді: пломба алынған кезде бірден бұзылады.
Таңбалау жүргізілгеннен кейін ағаш туралы барлық ақпарат тауарларды таңбалау мен қадағалаудың ақпараттық жүйесіне енгізілді. Онда ағаштың шығу тегі, орманның түрі, ағаш кесу билетінің нөмірі, дайындаманың көлемі және жауапты тұлға туралы деректер тіркеледі. Әрбір бөренеге берілген бірегей код оның қозғалысын кеспеағаштан қоймаға дейін толық бақылауға мүмкіндік береді.
Жоба қорытындысы бойынша жүйені одан әрі дамытуға қатысты ұсыныстар әзірленді. Атап айтқанда, мемлекеттік ақпараттық жүйелермен интеграцияны кеңейту, орман учаскелерінде жұмыс істеуге арналған мобильді шешімдерді енгізу және тасымалдарды спутниктік мониторинг арқылы бақылау тетіктерін дамыту жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
