Үш өңірде балық азығын өндіретін зауыттар салынуы мүмкін

Қазақстанда 2030 жылға дейін балық өсіру және қайта өңдеу бойынша жалпы құны 54 млрд теңге болатын 40 жоба іске асырылмақшы, деп хабарлайды Kapital.kz іскерлік ақпарат орталығы ауыл шаруашылығы министрлігінің баспасөз қызметіне сілтеме жасап.

Жобаларды жүзеге асыру нәтижесінде балық өсіру көлемі 14,4 мың тоннаға, қайта өңдеу көлемі 10 мың тоннаға, ал балық азығын өндіру жылына 6,8 мың тоннаға жетуі жоспарлануда.

«Саланы әрі қарай дамыту және балық өсірудің тұрақты қарқынын қамтамасыз ету үшін арнайы балық азығы қажет. Осыған байланысты Алматы, Ақмола және Маңғыстау облыстарында заманауи балық азығын өндіретін зауыттар салу мәселесі қарастырылып отыр», – делінген хабарламада.

Ведомство 2021-2024 жылдары балық өсіру және қайта өңдеу бойынша 87 жобаны жүзеге асырғанын еске салды. Сол жобалардың жалпы құны 21,4 млрд теңгені құрап, кәсіпорындардың жылдық қуаты 20 мың тоннадан астам өнім өндіруге мүмкіндік берген. Бұл жобалар Қазақстандағы балық өнімдеріне тәуелділікті шамамен 15%-ға төмендетті.

2025 жылы жылдық қуаты 1,2 мың тоннаны құрайтын тағы 8 инвестициялық жоба пайдалануға берілді. Олардың ішінде Маңғыстау облысында іске қосылған торда балық өсіру шаруашылығын атап өтуге болады. Бұл Каспий теңізінің аумағында норвегиялық технологияларды қолданған Орталық Азиядағы алғашқы жоба болып табылады. Жобаны Organic Fish компаниясы жүзеге асырған. Жобаның құны 12 млрд теңгені құрап, өндірістік қуаты жылына 5 мың тонна албырт балық өсіреді. 2025 жылдың қараша-желтоқсан айларында теңіз торларында албырт балық тұқымдастардың шамамен 200 грамм салмақтағы жас балықтары жіберілген. Қазіргі уақытта жоба белсенді өндірістік кезеңге өтті.

Сонымен қатар, Қазақстанда 2027 жылы аквашаруашылықты дамытуға арналған ақпараттық жүйе енгізілуі жоспарланып отыр. 2025 жылы балық шаруашылығына 4,6 млрд теңге инвестиция салынды. Сол жылы Қазақстанда тоңазытылған және мұздатылған балық өндірісі 18%-ға артты.