Қызылорда – Ақтөбе жолын төрт жолақты ету жобасының бірінші кезеңі басталды

Қызылорда облысында «Батыс Еуропа – Батыс Қытай» халықаралық автомагистралі бойындағы Қызылорда – Ақтөбе бағытын төрт жолаққа дейін кеңейту жобасының бірінші кезеңі басталды, деп хабарлайды Kapital.kz іскерлік ақпарат орталығы облыс әкімдігінің баспасөз қызметіне сілтеме жасап.

Мәліметке сәйкес, демеушілер қаражаты есебінен 350 млн теңгеге техникалық-экономикалық құжаттама дайындалып, 487 шақырым жол бойынша мемлекеттік сараптаманың оң қорытындысы алынған.

Жоба екі кезеңнен тұрады. Бірінші кезең – Қызылорда қаласын айналып өтетін 26 шақырымдық айналма жол салу. Екінші кезең – Қызылордадан басталып, Сырдария, Жалағаш, Қармақшы аудандарын айналып өтіп, «Батыс Еуропа – Батыс Қытай» халықаралық көлік дәлізіне қосылатын 462 шақырым жол құрылысы.

Автомагистраль бойында 11 жаңа көпір, 13 жол өткелі, мал өтетін 62 өткел және 399 су өткізу құбыры салынады. Сонымен қатар жолаушылар мен жүргізушілерге арналған заманауи сервистік қызмет көрсету нысандары пайда болады. Бұл шағын және орта бизнестің дамуына мүмкіндік береді.

Әкімдіктің мәліметінше, автомобиль жолын II санаттан I санатқа ауыстыру көлік қатынасын айтарлықтай жеңілдетіп, жүк тасымалының тиімділігін арттырады.

Бұған дейін Қарағанды – Жезқазған бағыты бойынша жол құрылысы биыл мамыр айында басталатыны хабарланған. Сондай-ақ биыл Транскаспий халықаралық көлік бағдары аясында «Бейнеу – Сексеуіл» жобасын іске асыру жоспарланып отыр. Бұл бағыт жолды шамамен 1000 шақырымға қысқартып, жүк жеткізу мерзімін үш тәулікке дейін азайтуға мүмкіндік береді.