Қарағанды – Жезқазған бағытындағы жолдың құрылысы мамырда басталады

Жергілікті маңызы бар 32 мың шақырым жолдың нормативтік жағдайын 95%-ке жеткізу жоспарлануда. Бұл туралы бүгін үкімет отырысында автожол саласының дамуы жөнінде баяндама жасаған ҚР көлік министрі Нұрлан Сауранбаев хабарлады, деп жазады Kapital.kz іскерлік ақпарат орталығының тілшісі.

«Алдағы үш жыл ішінде жергілікті атқарушы органдармен бірлесіп жұмыстарды бес есе арттыру көзделуде, нәтижесінде 32 мың шақырым жергілікті жолдардың нормативтік жағдайы 95%-ке жеткізіледі», – деді ол.

Төртінші санаттағы жолдың бір шақырымын салу құны асфальт үшін 500 млн теңге, қиыршық тас төсемі үшін 100 млн теңге. Жөндеу құны: асфальт – 156 млн, қиыршық тас жолдар – 50 млн теңге.

«Аталған шараларды іске асыру үшін ведомстволық нормативтерге сәйкес түзетулер енгізілді. Қазіргі уақытта қолданыстағы стандарттарға өзгерістер енгізу жұмыстары аяқталып қалды. Сонымен қатар, өткен аптада әкімдіктер өкілдерінің қатысуымен кеңес өтті. Өзара түсіністікке қол жеткізілді, жергілікті атқарушы органдар берілген тапсырмаларды тәжірибелік іске асыруға кірісті», — деп нақтылады Нұрлан Сауранбаев.

Республикалық жол желісі бойынша жеті халықаралық автомобиль дәлізі қалыптастырылған.

«Соңғы жылдары «Қалбатау – Майқапшағай», «Талдықорған – Өскемен», «Атырау – Астрахань» және «Қарағанды – Алматы» төрт ірі жоба аяқталды. Аталған жолдардың жалпы ұзындығы 2000 шақырым. Кейбір дәліздерде қозғалыс қарқыны артқаны және олардың шектік режимде жұмыс істеп жатқанын ескере отырып, олардың кейбір учаскелерін әрі қарай дамыту мен жаңарту жоспарланып отыр.»», — деп атап өтті министр.

«Темір-Баба – Ресей Федерациясы шекарасы» бағыты бойынша «Жаңаөзен – Түрікменстан шекарасы» учаскесінде жұмыстар жүргізілуде. Сонымен қатар жолды төрт жолақты етуге техникалық-экономикалық негіздеме әзірленуде. Аталған учаскедегі жұмыстар биыл аяқталады.

«Транскаспий халықаралық көлік бағдары (ТКМ) аясында «Бейнеу – Сексеуіл» жобасының іске асуы жолды шамамен 1000 шақырымға және жүктерді жеткізу мерзімін үш күнге дейін қысқартуға мүмкіндік береді. Техникалық-экономикалық негіздеме дайындалды (шамамен құны 780 млрд теңге). Қазіргі уақытта қаржы тарту рәсімдері жүргізілуде. Құрылыс жұмыстарын бастау биылға жоспарланған», – деп түсіндірді министр.

Негізгі транзит бағыттарынан бөлек, өңірлік және әлеуметтік маңызы бар жобаларды, оның ішінде «Қарағанды – Жезқазған» және «Орталық – Батыс» бағыттарын дамытуға ерекше назар аударылуда. Дайындық жұмыстары жүргізілуде, құрылысты биыл мамырда бастау жоспарланған.

«Қызылорда – Ақтөбе» учаскесі ең маңызды халықаралық дәліздердің біріне кіреді. Ол «Батыс Еуропа – Батыс Қытай» бағыттары мен РФ және Орталық Азия елдері бағдарларының байланыс буыны болып табылады. «Қызылорда – Ақтөбе» жобасы үш учаскеге бөлінген. Биыл «Ақтөбе – Ұлғайсын» және «Сексеуіл – Қызылорда» учаскелерінің құрылысы басталады. «Ұлғайсын – Сексеуіл» учаскесінің құрылысын келесі жылы бастау жоспарланған. Жоспар бойынша үш учаскенің де жұмыстарын бір мезгілде аяқтау көзделген», — деді министр.

2029 жылға дейін 10 мың шақырым жолда орташа жөндеу жүргізіледі. Қазіргі таңда 5 мың шақырым жол жөнделді. 2029 жылға дейін тағы 5 мың шақырым жөнделеді.

«Үш жылдың ішінде жалпы ұзындығы 3,25 мың шақырым болатын жобаларды жүзеге асыру жоспарлануда, қаржыландыру көлемі 4,6 трлн теңге. Оларды іске асыру транзиттік әлеуетті едәуір арттырып, тікелей экономикалық тиімділік береді», – деп түсіндірді Нұрлан Сауранбаев.

Бұған дейін хабарланғандай, Қазақстанда автожолдар үшін ортақ аралық жөндеу мерзімдері белгіленеді. Сонымен қатар, елдегі барлық проблемалық жол учаскелерін қайта қарау жоспарланған.