Атырау қаласында аялдамалар кәсіпкерлердің сенімгерлік басқаруына беріледі
Басқарушылар e-qazyna.kz сайтында ашық конкурс арқылы таңдалды
Атырау қаласында жеті көлік аялдамасы 10 жыл мерзімге кәсіпкерлердің сенімгерлік басқаруына берілді, делінген Атырау облысының әкімдігі хабарламасында. Оның негізгі мақсаты – аялдамаларды күтіп-ұстауды, қауіпсіздігін және инфрақұрылымын жақсарту, деп әкімдік сайтында түсіндірілген.
Кәсіпкер Айдар Джумиян 2020 жылы Нұрсая шағынауданы аумағынан жер телімін алып, құрылысқа 20 млн теңге инвестиция салған. Қазіргі таңда аялдама көше аймағы, жылы павильон және гүл дүкені секілді үш блоктан тұрады.
«Бұдан бөлек, біз тағы екі аялдаманы сенімгерлік басқаруға алдық. Олардың құжат жұмыстары енді ғана аяқталды, көктемде Геолог шағынауданында тағы екі аялдаманың құрылысына кірісеміз. Жалпы алғанда, кәсіпкерлер үшін 10 жыл мерзім тиімді. Аталған уақыт ішінде қанша қаражат қажет болатынын есептеуге және нысанды қаншалықты сапалы салуға болатынын жоспарлауға мүмкіндік бар. Бұл уақыт кезеңі өтелімділік пен барлық күрделі инвестициялардың ақталуы үшін жеткілікті», – деді кәсіпкер.
Қалалық қаржы бөлімі басшысының орынбасары Гүлжан Құлбаева басқарушыларды e-qazyna.kz сайтында ашық конкурс арқылы таңдағандарын айтты.
«Кәсіпкерлерге тек тазалық пен тәртіпті сақтау ғана емес, сонымен қатар тәулік бойы бейнебақылау, күзет және инфрақұрылымды бақылау міндеттері жүктелді. Сонымен қатар кәсіпкерлер іргелес аумақты коммерциялық мақсатта пайдалана алады», – деп қосты ол.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
