Семейде бұршақ және майлы дақылдарды қайта өңдеу зауыты ашылды

Семейде «Agrolider KAZ» ЖШС базасында бұршақ және майлы дақылдарды қайта өңдеу зауыты пайдалануға берілді. Кәсіпорынның жылдық шикізат өңдеу қуаты 72 мың тоннаны құрайды. Жобаның жалпы құны 4,1 млрд теңге болды. 50 жаңа жұмыс орны құрылды, деп хабарлайды Kapital.kz іскерлік ақпарат орталығы тілшісі Абай облысы әкімдігінің баспасөз қызметіне сілтеме жасап.

«Мұндай жобалар облыстың инвестициялық тартымдылығын арттырып, заманауи технологиялар мен стандарттарды енгізуге ықпал етеді. Елімізде мұндай өндіріс жоқ екенін ерекше атап өткім келеді. Ең бастысы – біз тек шикізат өндіруші ретінде емес, сапалы дайын өнім шығаратын өңір ретінде қадам жасап отырмыз. Бұл ауыл шаруашылығы өндірушілерінің табысын арттыруға, экспорттық әлеуетті кеңейтуге және инвестициялық тартымдылықты нығайтуға ықпал етеді», – деп атап өтті Абай облысының әкімі Берік Уәли.

Сыртқы істер министрінің орынбасары Әлібек Қуантыров өз сөзінде жаңа зауыттың ел экономикасы үшін маңыздылығын атап өтті. «Agrolider» ЖШС негізін қалаушы Әсемқан Досқожинов зауыт құрылысының қысқа мерзімде аяқталғанын айтты.

«Бұл өндіріс небәрі бір жарым жыл ішінде салынды. Біз облыс әкімдігіне жан-жақты қолдау көрсеткені үшін алғысымызды білдіреміз. Өнім 10 елге экспортталатын болады және жаңа зауыт ел экономикасының дамуына елеулі үлес қосатынына сенімдіміз», – деді ол.

2023 жылы құрылған «Agrolider KAZ» ЖШС жарма, ұн және басқа да тағам өнімдерін өндіруге маманданған. Мұнда жасымық, зығыр, бұршақ, жүгері, қарақұмық және басқа да ауыл шаруашылығы дақылдарының түрлі түрлері қайта өңделеді. Зауыттың жылдық өндірістік қуаты 800 тонна дайын өнімді құрайды. Өнім Еуропа елдеріне, Қытайға, Түркияға және Африка елдеріне экспортталады.

Былтыр облыста агроөнеркәсіп кешенін дамыту жөніндегі «Жол картасы» аясында жалпы сомасы 16,3 млрд теңгеге 11 ірі агрожоба жүзеге асырылды. Биыл өңдеу саласында «QAZAQ-ASTYQ GROUP» ЖШС базасында 7,3 млрд теңгеге тазартылған май өндіру жобасын және «Eurasia Agro Semey» ЖШС базасында 7,7 млрд теңгеге ірі ет өңдеу зауытын іске қосу жоспарлануда.

Еске салайық, швейцариялық Harvest Agro компаниясы Қазақстанның агроөнеркәсіп кешеніне 700 млн доллардан астам инвестиция салғалы отыр. Алматы және Шығыс Қазақстан облыстарында, сондай-ақ Абай және Жетісу облыстарында ауыл шаруашылығы өнімдерін қайта өңдеу зауыттарын салу және әр өңірде 50 мың гектар жерді игеру жоспарлануда.

Сондай-ақ VIII Қазақстандық жаһандық инвестициялар жөніндегі дөңгелек үстелде (KGIR-2025) 7,5 млрд доллар сомасына 49 құжатқа қол қойылғанын еске саламыз. Олардың қатарында ҚР Ауыл шаруашылығы министрлігі, Қызылорда облысының әкімдігі және Harvest Agro компаниясы арасында өңірде агроиндустриялық кластер құру жобасын іске асыру жөніндегі негіздемелік келісім бар. Сондай-ақ Harvest Agro Holding компаниясының Солтүстік Қазақстан облысында агроиндустриялық кластер құру жоспарлары туралы хабарланған болатын.