Ұлттық цифрлық инвестициялық платформадағы жобалардың үштен бірі қайталанады – «Бәйтерек» басшысы

Ұлттық цифрлық инвестициялық платформадағы жобалардың үштен бірі бірін-бірі қайталайды. Бұл туралы бүгін Үкімет отырысы барысында экономиканы одан әрі әртараптандыру жөніндегі холдингтің шаралары туралы баяндаған «Бәйтерек» ҰБХ» АҚ басқарма төрағасы Рустам Қарағойшин мәлімдеді, деп хабарлайды Kapital.kz іскерлік ақпарат орталығының тілшісі.

«Министрліктермен, әкімдіктермен және Kazakh Invest-пен жұмыстың үйлесімділігін қамтамасыз ету үшін холдинг жобаларды бастапқы іріктеуді оңтайландыру критерийлерін қосымша жолдайды. Қазіргі уақытта холдингте 2026 жылға арналған 3,4 трлн теңге қаржыландыру сомасына 449 пысықталған инвестициялық жобадан тұратын пайплайн бар. Осы пайплайннан құны 7 млрд теңгеге дейінгі 12 жоба 45 млрд теңге сомасына екінші деңгейлі банктерге беріледі», – деді ол.

Холдинг Ұлттық цифрлық инвестициялық платформа (ҰЦИП) базасындағы шамамен 80 трлн теңге сомасына 1 319 әлеуетті жобадан тұратын пулды қарастырған. «Алайда бұл жобалар пулында олардың пысықталу деңгейі туралы ақпарат жоқ, жобалардың 30%-ға дейіні бірін-бірі қайталайды. Сонымен қатар әкімдіктер жеке ұсынған жобалар ҰЦИП-та көрініс таппаған. Осыған байланысты ҰЦИП-ты инвестициялық жобалардың Бірыңғай базасы әрі сапалы іріктеу мен бағалаудың негізгі көзі ретінде жетілдіру үшін бірлескен күш-жігер қажет», – деп түсіндірді холдинг басшысы.

Оның айтуынша, экономиканың негізгі секторларының орнықты өсімін қамтамасыз ету үшін холдинг экономиканы әртараптандыруға ықпал ететін инвестициялық жобаларды қолдаған. Бұл жобалар инвестициялық кезеңнен өтуде.

Металлургия саласында жалпы құны 3,9 трлн теңгені құрайтын 23 жоба іске асырылуда. Мысалы, металлургиялық кластерді кешенді жаңғырту (1,75 трлн теңге), Ақтоғай тау-кен байыту комбинаты (1,85 трлн теңге), ферросилиций өндіретін зауыт (127 млрд теңге) және басқалары.

«Жалпы сомасы 13,6 трлн теңгені құрайтын 55 әлеуетті жоба айқындалды, олардың қатарында Qarmet-ті жаңғырту жобасы (1,6 трлн теңге), мыс өңдеу және байыту (1,3 трлн теңге) және басқалары бар. Машина жасау саласында 610,6 млрд теңге сомасына 21 жоба қаржыландыру сатысында, олардың ішінде кеме жасау верфін салу (132,5 млрд теңге), соғылған бұйымдар шығаратын ұсталық-бандаж кешені (73,2 млрд теңге) және басқалары бар», — деп қосты Рустам Қарағойшин.

Сонымен қатар қарауға 642 млрд теңге сомасына 20 жоба келіп түседі деп күтілуде. Бұл – мультибрендті автомобильдер шығаратын зауыт салу (150 млрд теңге), теміржол вагондарын өндіру зауыты (106 млрд теңге), ауыр машина жасау зауыты (27 млрд теңге) және басқа жобалар.

«Химия өнеркәсібінде 636 млрд теңгеге 11 жоба іске асырылуда. Олардың қатарында кальцийлендірілген сода өндіру (190 млрд теңге), каустикалық сода зауыты (152 млрд теңге), күкірт қышқылы зауыты (113 млрд теңге) және басқалары бар. Әлеуетті жобалар саны – 7,2 трлн теңге сомасына 35 жоба, олардың ішінде аммиак-карбамид кешені (931 млрд теңге), калий тұздарын байыту-өндірістік кешені (905,8 млрд теңге) бар», — деп нақтылады ол.

Энергетика және мұнай өңдеу саласында 1,3 трлн теңге сомасына 9 жоба бар. Олардың қатарында газ өңдеу зауытын салу (446 млрд теңге), метанол газ-химия кешені (79 млрд теңге), Алматы ЖЭО-2-ні жаңғырту (436 млрд теңге) және басқалары аталды.

ҰЦИП-та 39,7 трлн теңге сомасына 100 әлеуетті жоба бар. Олардың қатарында жасыл сутегі өндіретін зауыт салу (3,6 трлн теңге), мұнай өңдеу зауыттарының өндірістік қуатын кеңейту (2,5 трлн теңге), Семейде ЖЭО салу (714 млрд теңге) және басқа жобалар бар.

«Агроөнеркәсіп кешені саласында 415,9 млрд теңгеге 69 жоба іске асырылуда. Бұл – 51,2 гектар жылыжай кешенін салу (69 млрд теңге), бройлер етін өндіру және өңдеу бойынша тұйық циклді құс фабрикасы (24 млрд теңге), алма шырыны концентратын, жеміс-жидек және көкөніс пюресін өндіру, өңдеу және буып-түю зауыты (9 млрд теңге) және басқалары», — деп хабарлады Рустам Қарағойшин.

Инвестицияларға тапсырыс желісі бойынша ҰЦИП-қа Ауыл шаруашылығы министрлігінің басымдықтарына сәйкес майлы дақылдарды өңдеу, астықты терең өңдеу, ет, сүт, тері мен жүн өңдеу сияқты секторлар бойынша 2,3 трлн теңге сомасына 208 жоба енгізілген.

«Маңызды жобалардың қатарында Atameken-Agro май экстракциялау зауытының құрылысы (41 млрд теңге), Qostanai Grain Industry астық өңдеу зауыты (50 млрд теңге), Nurym Group ет комбинаты (17,6 млрд теңге), Seven Rivers сүт өңдеу жобасы (7,4 млрд теңге), тері мен жүн өңдеу цехы (5,4 млрд теңге) және басқалары бар. Осылайша холдинг инвестициялық холдинг ретіндегі жаңа мәртебесінде экономиканы әртараптандыру жұмысын жалғастырады», – деп түйіндеді ол.

Еске салайық, бүгін Қазақстанда инвестициялық жобаларды қалыптастыру мен іске қосудағы мемлекеттің қатысуы артатыны да белгілі болды