Тауар өндірушілер тізіліміне 600-ден астам компания тіркеле алмады

Бүгінде шамамен 900 кәсіпорын қазақстандық тауар өндірушілер тізіліміне тіркелді. Бұл туралы Үкімет отырысының қорытындысы бойынша өткен баспасөз конференциясында Өнеркәсіп және құрылыс министрі Ерсайын Нағаспаев мәлімдеді, деп хабарлайды Kapital.kz іскерлік ақпарат орталығының тілшісі.

Министрдің айтуынша, 600-ден астам компанияға тіркеуден бас тартылған.

«600-ден астам компанияға бас тарттық. Бұлар – жалған өндірушілер деп аталатындар. Кейбірі өз өндірісіне қатысы жоқ бейнематериалдарды тіркейді. Тіпті мүлде басқа мазмұндағы видеолар да болған. Сірә, компаниялар өздерінің қазақстандық өндіріске тиесілі екенін дәлелдегісі келмейді. Әртүрлі себеп бар. Жұмыс ауыр. Бірақ біз бұл жұмысты тек министрлік айналысып жатыр деген сөз болмауы үшін «Атамекен» ҰКП-мен бірлесіп жүргізіп жатырмыз. Жұмысты әрі қарай жалғастырамыз», – деді ол.

Министрдің сөзінше, тізілім қазір ең көп талқыланып жатқан мәселелердің біріне айналған. Ол кімнің шын мәнінде қазақстандық өндіруші екенін анықтау үшін іске қосылған.

«Бұрын компания нарықта жұмыс істей отырып, белгілі бір сомаға индустриялық сертификат алып, Қазақстан аумағында ештеңе өндірмеген, тіпті қызметкерлері де болмаған жағдайлар кездесті. Көрші елдерден тауар әкеліп, оны отандық өндіруші брендімен сатып, мемлекеттен түрлі жеңілдіктер алған. Оның ішінде мемлекеттік сатып алулар мен квазимемлекеттік сектор сатып алуларына қатысқан», – деп атап өтті Ерсайын Нағаспаев.

Оның айтуынша, бұл үдеріс ең алдымен бюрократияны азайтуға бағытталған. Енді кәсіпкерлерге түрлі мекемелерге барып, жергілікті өндіруші мәртебесін дәлелдеудің қажеті жоқ.

«Сонымен қатар бұл қызмет тегін көрсетіледі. Бұрын индустриялық сертификаттың құны 15 млн теңгеге дейін жеткені туралы әңгімелер болған. Тізілімнің өзі және оның нормативтік базасы өткен жылы дайын болды. Ресми түрде 2026 жылдың 1 қаңтарынан бастап іске қосылды. Мәселе индустриялық сертификат иелеріне қатысты туындады. 1924 кәсіпорын алаңдаушылық білдіріп, өткен жылдың соңында тізілімге үлгермейміз деген пікір айтты», – деді министр.

Осыған байланысты Үкімет индустриялық сертификаттардың қолданылу мерзімін 2026 жылғы 1 наурызға дейін ұзарту туралы шешім қабылдаған. Бұл жаңа жүйеге кезең-кезеңімен көшуге мүмкіндік береді.

«Қазір тізілімге 1924 индустриялық сертификат иесі автоматты түрде енгізілді. Бұл олардың мәңгілікке тізілімде қалады деген сөз емес. Әр тоқсан сайын скоринг жүргізіледі. Ол жалған өндірушілерді анықтап, алып тастайды. Сонымен қатар белгілі бір рәсімдерден өту қажет: тіркелу, электронды қолтаңба қою, барлық құжаттарды, соның ішінде қызмет туралы бейнеесептерді ұсыну. Біз күн сайын таңертең және кешке қанша компания тіркелгенін талдап отырамыз», – деп түйіндеді министр.

Тізілім мемлекеттік қолдаудың атаулылығын қамтамасыз ету, рәсімдердің ашықтығын арттыру және мәртебені формалды түрде иеленуді болдырмау үшін қазақстандық тауар өндірушіні растаудың бірыңғай цифрлық жүйесін қалыптастырады.

Бұған дейін кәсіпкерлер тізілімнің цифрлық платформасымен жұмыс істеу барысында бірқатар мәселелер туындағанын айтқан. Олардың қатарында техникалық ақаулар, веб-порталға қолжетімділіктің шектелуі, өтінімдер бойынша бас тартулар, деректердің жоғалуы, өнімнің ел ішіндегі құндылығын растаудағы қиындықтар және мемлекеттік сатып алуларға қатысудағы кедергілер бар. Мұндай ақаулар келісімшарттардың жоғалуына және кәсіпорындар үшін тікелей шығындарға әкелуі мүмкін, сондықтан жедел араласуды талап етеді.