Премьер аграрлық жеңілдетілген несиелеуді «цифрға» көшіруді тапсырды

Премьер-министр Олжас Бектенов үкімет отырысында аграрлық жеңілдетілген несиелеуді оңайлатып, цифрлық форматқа көшіруді, отын мен судың жеткізілуін бақылауды, агротехнологиялардың сақталуын және қаражаттың мақсатты пайдалануын қамтамасыз етуді тапсырды, деп хабарлайды Kapital.kz іскерлік ақпарат орталығының тілшісі.

«Бірінші. Фермерлер әлі күнге дейін несие алу үшін қағаз құжаттарды пайдаланауға мәжбүр. Ауыл шаруашылығы министрлігіне Ақпараттық технологиялар және цифрлық даму министрлігі және «Бәйтерек» холдингімен бірлесіп диқандарды тиімді және ашық мемлекеттік қолдауды қамтамасыз ету үшін жеңілдетілген несиелеу рәсімін оңайлатып, оны цифрлық форматқа көшіруді тапсырамын», – деді ол.

Екінші, энергетика және ауыл шаруашылығы министрліктері, сондай-ақ облыс әкімдіктері белгіленген көлемде арзандатылған отын жеткізілуін қатаң бақылауды қамтамасыз етуі қажет. Әкімдіктер бір апта ішінде аймақтық операторлар бойынша толық және өзекті мәліметтерді ұсынуы тиіс. Белгіленген мақсатқа сай пайдаланылмаған отынды сататын тұлғаларға құқық қорғау органдары тарапынан ең қатаң шаралар қолданылуы қажет.

«Үшінші, Су ресурстары және ирригация министрлігі, ауыл шаруашылығы министрлігі және әкімдіктермен бірге егістік кезеңінде фермерлерге су жеткізуді үздіксіз қамтамасыз ету бойынша кешенді шаралар қабылдауы қажет. Фермерлерді тамшылатып және жаңбырлату жүйесіне көшіруге ынталандыру, су үнемдеу технологияларын енгізу жұмыстарын жандандыру керек», – деп қосты Олжас Бектенов.

Оның айтуынша, солтүстік және шығыс өңірлерінің әкімдіктері қар тоқтату және ылғал жинау бойынша шаралар жүргізуі қажет.

«Төртінші, Экология министрлігі егістік мерзімдерін алдын ала жоспарлау және ауа райының өзгеруіне жедел әрекет ету үшін аграрларға метеорологиялық болжамдарды уақытында ұсынуы қажет. Бесінші, облыс әкімдіктері егіс жұмыстарын жүргізу барысында ауыл шаруашылығы өнімдерінің жалпы көлемін екі есеге арттыру индикаторларын орындауды қамтамасыз етуі тиіс», – деді ол.

Премьер-министр ауыл шаруашылығы министрлігі мен өңір әкімдеріне көктемгі дала жұмыстарын уақтылы өткізу мәселесін ерекше бақылауда ұстауды тапсырды. Ол былтырғыдай, егіс және орақ жұмыстарына қаржыландыру көлемі 1 трлн теңге деңгейінде сақталғанын, оның ішінде 300 млрд теңге техника лизингіне бағытталатынын еске салды.

«Фермерлерге 402 мың тонна жеңілдетілген отын бөлінген. Демек, мемлекет тарапынан аграрлық маусымды сапалы өткізу үшін барлық қажетті жағдайлар қамтамасыз етілген. Басты мақсат – жоспарланған іс-шараларды тиімді және уақтылы орындау. Мемлекеттік қолдау тек тиімді және адал фермерлерге берілуі тиіс», – деп атап өтті ол.

Әкімдіктер бөлінген қаражаттың мақсатты пайдалануын тұрақты бақылауда ұстауы қажет. Ол үшін цифрлық технологияларды барынша қолдану керек.

«Осы жылы да егісті әртараптандыру жұмысын жалғастыру қажет. Экспортқа бағдарланған және нарық сұранысы жоғары жоғары рентабельді дақылдарды өсіруді кеңейтуге негізгі назарды аудару керек. Бұған дейін мен ылғалға тәуелді дақылдарға тәуелділікті азайту шараларын қабылдауды тапсырған едім. Фермерлерді құрғақшылыққа төзімді технологияларға көшіру бойынша жергілікті деңгейде түсіндіру жұмыстарын жалғастыру керек», – деді премьер.

Сонымен қатар, егіс жұмыстарында агротехнологияларды сақтау, тыңайтқыштарды уақытында енгізу және өсімдіктерді қорғау құралдарын қолдану міндетті.

«Осы жылдың тыңайтқыш енгізу жоспары ғылыми негізделген норманың 73%-дан астамын, яғни 2,3 млн тоннаны құрайды. Ауыл шаруашылығы және өнеркәсіп министрліктері фермерлерді сапалы және қолжетімді тыңайтқыштармен қамтамасыз етуі тиіс. Бірінші кезекте отандық өндіріс тыңайтқыштарына басымдық беру қажет. Тыңайтқыш енгізу жоспарларын ғылыми нормаларға сәйкес жедел орындауды тапсырамын. Бұл өсімдік шаруашылығында өндіріс тұрақтылығын қамтамасыз етеді», – деп қосты ол.

Фермерлерді сапалы және тексерілген тұқымдармен қамтамасыз етуге ерекше көңіл бөлінуі керек – элиталық, Қазақстан жағдайына бейімделген тұқымдардың үлесін арттыру қажет.

«Бұл бағытта отандық тұқым өндірушілерін ынталандыру шараларын қарастыру керек. Сондай-ақ, ауыл шаруашылығы техникаларының техникалық дайындығы, қазіргі уақытта шамамен 80%, егіс жұмыстары басталғанға дейін 100%-ға жеткізуді тапсырамын», – деді Олжас Бектенов.

Ол фермерлерді цифрлық шешімдерді кеңінен қолдануға ынталандыру қажеттігіне де назар аударды.

«Цифрлық технологиялар климаттық қауіп-қатерді болжау, өнім көлемін бағалау, өсімдіктерді қорғау құралдары мен тыңайтқыштарды тиімді пайдалану үшін маңызды рөл атқарады. Су ресурстарын оңтайландыру үшін цифрландыруды қолдануға ерекше назар аудару қажет. Мүдделі мемлекеттік органдардан отандық технологиялық шешімдер мен стартаптарды тартуды қамтамасыз етуін тапсырамын», – деп қорытындылады ол.

Бұған дейін хабарланғандай, оңтүстік өңірдің фермерлері су тапшылығына тап болуы мүмкін. Егіс және орақ науқандарына несиеге 700 млрд теңге бөлінеді. Қазақстанда жүгері егісін 265 мың га-ға дейін арттыру көзделуде. Биыл осы дақылдың егістік алқабын 90 мың га-ға көбейту жоспарланған. Сондай-ақ, ауыл шаруашылығы жерлерін тиімді пайдалану жоспары әзірленеді. Сонымен қатар, 2030 жылға дейін агроөнеркәсіп саласы үшін 63 мың маман қажет болады.